ក្រោយពីមានភ្លៀងធ្លាក់យ៉ាងគំហុកប៉ុន្មានថ្ងៃជាប់គ្នា ពេលនេះទឹកជំនន់បានកំពុងតែជន់ដល់ខេត្តសុផាន់បុរី ប្រទេសថៃ ឱ្យមានការលិចលង់ជាថ្មី ដល់ថ្នាក់អាជ្ញាធរបានប្រកាសអាសន្ន ៤ ស្រុកធំៗ កំពុងស្ថិតក្នុងមហន្តរាយ។
តាមព័ត៌មានបានឱ្យដឹងថា ការធ្លាក់ភ្លៀងជាប់គ្នាជាច្រើនថ្ងៃ បានធ្វើឱ្យទឹកទន្លេថាជីនឡើងយ៉ាងគំហុក ដែលបណ្តាលឱ្យហូរហៀរចូលដល់ខេត្តសុផាន់បុរី ហើយមានស្រុកចំនួន ៤ ដែលត្រូវបានអាជ្ញាធរប្រចាំខេត្តបានប្រកាសអាសន្នថាកំពុងតែស្ថិតក្នុងមហន្តរាយ ដែលតម្រូវឱ្យមានការប្រុងប្រយ័ត្នបំផុតនោះគឺមានស្រុកមឿង ស្រុកសងភីណង ស្រុកបាងប្លាម៉ា និងស្រុកដានឆាង។
យ៉ាងណាមិញ អាជ្ញាធរប្រចាំខេត្តកំពុងតែប្រើវិធានការទប់ស្កាត់ទឹកជំនន់ ដូចជារៀបចំបាវខ្សាច់ទប់ទឹក ទៅពង្រីកមាត់លូ និងមាត់ប្រឡាយ ដើម្បីពន្លឿនការបង្ហូរទឹកចេញ ក៏ដូចជាការតាមដានស្ថានភាពទឹកជំនន់យ៉ាងជាប់លាប់ ជាពិសេសគឺមានគម្រោងធ្វើកន្លែងស្តុកទឹកថ្មី តែអាចនឹងត្រូវការការពិភាក្សាឱ្យបានល្អិតល្អន់ជាងនេះ៕
ប្រភព៖ Khaosod
