បើទោះមិនបានឈរឈ្មោះលើអាជីពសិល្បៈជាអ្នកដឹកនាំសម្តែងតាមបណ្តាផលិតកម្មនានាដូចមុនក៏ពិតមែន ប៉ុន្តែអតីតអ្នកដឹកនាំល្បីឈ្មោះ ឧកញ៉ា ប៊ុន រតនា នៅតែបន្តបង្កើតសមិទ្ធផលថ្មីៗជាច្រើន ក្នុងការផលិតវីដេអូអប់រំ និង ជួយសង្គមផ្សព្វផ្សាយពីកម្ពុជា កាលពីពេលកន្លងមកទទួលបានការគាំទ្រយ៉ាងខ្លាំង។ ម្យ៉ាងវិញទៀតនោះ ឧកញ៉ា ប៊ុន រតនា ក៏តែងតែជួយដល់ការងារសប្បុរសធម៌តាមរយៈការបរិច្ចាគ និង ឧបត្ថម្ភថវិកាទៅសង្គមជាច្រើនវិស័យជាច្រើនទៀតផងដែរ។
យ៉ាងណាមិញ ថ្មីៗនេះ អតីតអ្នកដឹកនាំល្បីឈ្មោះ ឧកញ៉ា ប៊ុន រតនា បានធ្វើឱ្យអ្នកគាំទ្រផ្ទុះការសរសើរយ៉ាងខ្លាំងពីទឹកចិត្តនៃការស្រឡាញ់វិស័យគុនខ្មែរ ដោយឧកញ៉ា បានប្រកាសឧបត្ថម្ភកីឡាករ លី ចំរើន ឬ ចំរើន គុនខ្មែរ នូវទឹកប្រាក់ ១ លាន ក្នុងការប្រកួតរវាងកីឡាករប្រដាល់ជនជាតិជប៉ុន តៃម៉ូ ហ៊ីសៃ។
ជាងនេះទៅទៀត អ្វីដែលកាន់តែគួរឱ្យចាប់អារម្មណ៍ ឧកញ៉ា បានប្រកាសថា បើទោះជាកីឡាករគុនខ្មែរ ចំរើន គុនខ្មែរ ប្រកួតចាញ់ ឬឈ្នះក្តី ក៏ឧកញ៉ាឧបត្ថម្ភដែរ។ តែយ៉ាងណាក៏ដោយ ក្រោយការប្រកួតហើយនោះ កីឡាករ ចំរើន គុនខ្មែរ ធ្វើបានល្អ ដោយយកឈ្នះកីឡាករប្រដាល់ជប៉ុន តៃម៉ូ ហ៊ីសៃ៕
