ចំពោះករណីអគ្គិភ័យដែលបានឆាប់ឆេះហាងថ្មីរបស់តារាស្រី ពេជ្រ ចរណៃ កាលពីវេលាម៉ោង ៨ យប់ថ្ងៃទី ១៨ ខែមិថុនា ឆ្នាំ ២០២៥ កន្លងទៅនេះ ត្រូវបានមហាជនអ្នកគាំទ្រលើបណ្ដាញសង្គមបន្តចែករំលែកបង្ហាញការសោកស្ដាយខ្លាំងជាមួយរូបនាង ដែលហាងថ្មីនេះបានរងការខូចខាតសម្ភារៈទាំងស្រុង។
ទាក់ទងនឹងហាងថ្មីរបស់ ពេជ្រ ចរណៃ ដែលបានឆាប់ឆេះនេះ ត្រូវបានគេដឹងថាជាហាងដែលនាងទើបតែរៀបចំរួច និង ត្រៀមសម្ភោធដំណើរការ ដែលមានចែកជា ៣ ផ្នែក មានអាហារដ្ឋានម្ហូបកម្ម៉ង់បែបខ្មែរ កាហ្វេល្បុក្កតោខ្មែរ និង ជាកន្លែងបង្ហាត់ក្បាច់គុនបុរាណខ្មែរផងដែរ។
បើតាមរយៈការរៀបរាប់ក្នុងវីដេអូសម្ភាសរបស់ ពេជ្រ ចរណៃ ក្រោយអគ្គិភ័យឆាប់ឆេះហាងថ្មីនេះដែរ បានឱ្យដឹងថាហាងថ្មីនេះនាងបានរៀបចំឡើងដោយជួលផ្ទះរបស់គេក្នុង ១ ខែជាង ៣០០០ ដុល្លារ ជាប្រភេទផ្ទះវីឡា ដែលទាំងការរៀបចំផ្ទះ និង រចនាទៅជាហាងនេះដែរ គឺនាងចំណាយអស់រាប់សិបម៉ឺនដុល្លារ ជាកម្លាំងញើសឈាមរបស់នាង ព្រមទាំងមានការកម្ចីធនាគារៀបចំបន្ថែមទៀត។
អ្វីដែលធ្វើឱ្យមហាជនកាន់តែបង្ហាញការស្ដាយ និង អាណិតចំពោះតារាស្រីរូបនេះ បន្ទាប់ពីអគ្គិភ័យឆាប់ឆេះខូចខាតទាំងស្រុងនេះដែរ ពេជ្រ ចរណៃ មិនត្រឹមតែខាតបង់លើការរៀបចំហាងទាំងអស់នោះទេ នាងថែមទាំងត្រូវទទួលបន្ទុកចំណាយលុយច្រើនជាងពេលរៀបចំហាងគុណនឹង ២ ដើម្បីជួសជុលសាងសង់ផ្ទះជួលឱ្យម្ចាស់គេឡើងវិញទៀត ដែលពេលនេះ នាងក៏បានចេញវីដេអូសុំទោសដល់ម្ចាស់ផ្ទះ និង សុំពេលវេលាដើម្បីឱ្យនាងបានរៀបចំផ្ទះឡើងវិញតាមលទ្ធភាពផងដែរ។
ស្របពេលបានឃើញតារាស្រី ពេជ្រ ចរណៃ ជួបទុក្ខធំខាតបង់ដើមទុនច្រើនក្រោយកើតហេតុការណ៍អគ្គិភ័យ និង ត្រូវជួសជុលផ្ទះឡើងវិញនេះដែរ ក្រៅពីមហាជន ក៏មានអ្នកសិល្បៈជាច្រើនបង្ហាញក្ដីអាណិតចំពោះនាង ដែលជាតារាស្រីមួយរូបតែងជួយថែរក្សា និង ផ្សព្វផ្សាយសិល្បៈក្បាច់គុនខ្មែរផ្សេងៗ។ ក្នុងនោះ ក៏បានឃើញហ្វេសប៊ុកតារាចម្រៀងស្រី ពេជ្រ សោភា បានបង្ហាញពីទឹកចិត្តអាណិត និង ចូលរួមជួយជាថវិកាដល់ ពេជ្រ ចរណៃ ចំនួន ៥០០ ដុល្លារ ដើម្បីជួយសម្រួលដល់ការខ្វះខាតលើការៀបចំផ្ទះឡើងវិញផងដែរ។
ក្នុងនោះ អ្នកនាង ពេជ្រ សោភា បានរៀបរាប់ថា ៖ «ប្អូនជាមនុស្សស្រីពូកែខ្លាំងណាស់ តស៊ូ លះបង់ដើម្បីប្រទេសជាតិ ក៏ជាអ្នកតែងតែផ្សព្វផ្សាយនូវវប្បធម៌ខ្មែរកន្លងមក ប៉ុន្តែកាលពីយប់មិញប្អូនបានជួបនៅរឿងដ៏អាក្រក់មួយ ជាការឆេះកន្លែងស្នាក់នៅ ក៏ជាកន្លែងបង្ហាត់គុនខ្មែររបស់អូន នាងខ្ញុំមានទឹកចិត្តបន្តិចបន្តួចជូនដល់ប្អូនស្រី»៕
