នៅថ្ងៃទី ០១ ខែសីហា ឆ្នាំ ២០២៥ កន្លងទៅនេះ ប្រជាជនខ្មែររស់នៅតាមបណ្តារដ្ឋជាច្រើននាប្រទេសកាណាដា ប្រមាណជា ៥០០ នាក់់ បានប្រមូលផ្តុំគ្នានៅទីក្រុងអូតាវ៉ា ដើម្បីបង្ហាញឆន្ទៈ និង សំឡេង ទៅកាន់ពិភពលោក ដែលប្រទេសថៃបានឈ្លានពានលើទឹកដីខ្មែរ។
តាមការបង្ហោះ របស់ផេក Khmer Montreal Soccer Team បានឱ្យដឹងថា ការជួបជុំនេះគឺជាលើកទី ១ ហើយ ដែលខ្មែររួបរួមគ្នាធ្វើមហាបាតុកម្មប្រឆាំងថៃ ដោយមហាជនខ្មែរបានមកពីគ្រប់តំបន់ មិនប្រកាន់និន្នាការគណបក្សនយោបាយណាទាំងអស់ ក្នុងគោលបំណងតែមួយ គឺជាតិខ្មែរតែមួយមិនថារស់នៅទីណា តែងតែបារម្ភយកចិត្តទុកដាក់ជានិច្ចចំពោះប្រទេសជាតិដែលជាស្រុកកំណើត។
ក្នុងនោះដែរ ក្បួនបាតុកម្មបានជួបជុំគ្នានៅមុខក្រសួងកិច្ចការបរទេសកាណាដា និង ដង្ហែបាតុកម្មឆ្ពោះទៅកាន់វិមានរដ្ឋសភាកាណាដា ដើម្បីសម្តែងមតិ និង ប្រគល់ញត្តិទៅរដ្ឋាភិបាលកាណាដា ដើម្បីបញ្ឈប់ការឈ្លានពានរបស់ថៃមកលើទឹកដីព្រះរាជាណាចក្រកម្ពុជា ក៏ដូចជាស្វែងរកសន្តិភាពដល់ប្រទេសកម្ពុជា និង ថែរក្សាសម្បត្តិបេតិភណ្ឌពិភពលោកដែលត្រូវបានថៃបំផ្លិចបំផ្លាញ។
គួរជម្រាបថា ក្នុងមហាបាតុកម្មខាងលើនេះ ក៏មានវត្តមានរបស់សិល្បការិនីល្បីឈ្មោះរបស់កម្ពុជា គឺកញ្ញា ឡាយ លក្ខិណា ដែលបាន និង កំពុងរស់នៅប្រទេសកាណាដាប្រមាណជាជិត ៤ ឆ្នាំផងដែរ៕
ប្រភព និង រូបភាព៖ Khmer Montreal Soccer Team
