នៅថ្ងៃទី ១៧ ខែវិច្ឆិកា ឆ្នាំ ២០២៥ ក្រសួងមហាផ្ទៃ បានចេញសេចក្ដីប្រកាសព័ត៌មាន ក្រោយពីមានការផ្សព្វផ្សាយតាមបណ្តាញសង្គម និង សារព័ត៌មាននានា ករណី លោកឧត្តមសេនីយ៍ឯក ស៊ាង ធារិទ្ធ អគ្គស្នងការរងនគរបាលជាតិ បានប្រើប្រាស់ពាក្យពេចន៍ និង កាយវិការមិនសមរម្យ លើមន្ត្រីក្រោមឱវាទ។
ក្នុងនោះ ក្រសួងមហាផ្ទៃ បានបញ្ជាក់ឱ្យបានដឹងថា ចំពោះករណី លោកឧត្តមសេនីយ៍ឯក ស៊ាង ធារិទ្ធ អគ្គស្នងការរងនគរបាលជាតិ ទាក់ទិនទៅនឹងការប្រើប្រាស់ពាក្យពេចន៍ និង កាយវិការមិនសមរម្យ លើមន្ត្រីក្រោមឱវាទ បច្ចុប្បន្ននេះត្រូវបានថ្នាក់ដឹកនាំក្រសួងមហាផ្ទៃ បានពិនិត្យ ស្រាវជ្រាវ និង ឈានទៅសម្រេចអនុវត្តវិន័យ តាមបទវិន័យនគរបាលជាតិកម្ពុជា ជាធរមាន។
សូមរំឭកផងដែរថា ថ្មីៗនេះ នៅលើបណ្ដាញសង្គម និង សារព័ត៌មាននានា បានចុះផ្សាយពីករណី លោកឧត្តមសេនីយ៍ឯក ស៊ាង ធារិទ្ធ បានប្រើប្រាស់ពាក្យពេចន៍មិនសមរម្យលើមន្ត្រីក្រោមឱវាទ ជាមួយនឹងសារសំឡេងថា ៖ «អញប្រកាសហើយ ប្រាប់ថាអញមកពីម៉ោង ៨ ដល់ម៉ោង ១០ អញទំនេរ ចឹងអាឆ្កែណាមីឆ្កែណាមកយកឱ្យអញស៊ីញ៉េហ្នឹង គឺតាមរកអញឱ្យឃើញទៅ អញនៅណាយកឱ្យអញស៊ីញ៉េហ្នឹងទៅ។ ស្អែកព្រឹកឡើងម៉ោង ៦ ព្រឹក អញចេញទៅកំពង់សោម ក្នុងករណីអាណាចង់ស៊ីញ៉េយកទៅស៊ីញ៉េនៅកំពង់សោម»៕
សូមចុចទីនេះដើម្បីស្ដាប់សារសំឡេង
