បើរំឭកពីការប្រកួតកម្មវិធីចម្រៀងលំដាប់អន្តរជាតិ Cambodian Idol រដូវកាលទី ៥ មហាជនច្បាស់ជានៅចាំនៅឡើយបេក្ខជន Top 6 លោក ទិត សិរីវឌ្ឍនា ដែលត្រូវបានគេលើកឡើងថាមានរូបសម្រស់ស្រដៀងនឹងតារាសម្តែងប្រុស Bosco Wong។
ជាការពិត បើទោះជាមិនអាចលើកពានក្នុងកម្មវិធីប្រកួតខាងលើក្តី តែលោក ទិត សិរីវឌ្ឍនា នៅតែទទួលបានប្រជាប្រិយភាព ដោយបន្តការគាំទ្រយ៉ាងខ្លាំងពីសំណាក់មហាជន។ ក្នុងនោះ តារាចម្រៀងប្រុសជំនាន់ក្រោយរូបនេះ ក៏បានចេញបទចម្រៀងផ្ទាល់ខ្លួន និង បានបង្កើតក្រុមចម្រៀងឈ្មោះ «The Four» ជាមួយនឹងអតីតបេក្ខភាពឆ្នើម Cambodian Idol រដូវកាលទី ៥ ចំនួន ៣ រូបទៀត រួមមាន លោក នួន បូរ៉ា, លោក ថៃ នរៈបណ្ឌិត និង លោក អ៊ុក មនោរិទ្ធ។
ស្របពេលអាជីពជាតារាចម្រៀងកាន់តែលេចធ្លោក្នុងវិស័យសិល្បៈ ថ្មីៗនេះ កំលោះសង្ហាវ័យ ២១ ឆ្នាំ លោក ទិត សិរីវឌ្ឍនា មានឱកាសបានបោះជំហានចូលក្នុងវិស័យភាពយន្ត ដោយជំហានដំបូងលោកបានឆក់តំណែងជាតួឯកទៀតផង។
ក្នុងនោះ ភាពយន្តលោក ទិត សិរីវឌ្ឍនា បានសម្តែង គឺជាភាពយន្តរន្ធត់ខ្នាតធំមានចំណងជើងថា «សងដៃខ្ញុំវិញ» ដែលកំពុងចាក់បញ្ចាំងតាមបណ្តារោងភាពយន្តនានា ហើយភាពយន្តខ្នាតធំនេះដែរ លោក ទិត សិរីវឌ្ឍនា សម្តែងជាតួអង្គ នរៈ ជាប៉ូលិសស៊ើបអង្កេតរឿងក្តីរបស់តួឯកស្រី គឺនាង បុប្ឋា ដែលសម្តែងដោយកញ្ញា សុផល លីនណា៕
