ថ្មីៗនេះ ក្រុមហ៊ុន Mattel ដែលជាក្រុមហ៊ុនផលិតតុក្កតាបាប៊ី (Barbie) សកល បានប្រកាសចេញនូវតុក្កតាបាប៊ីកើតជំងឺទឹកនោមផ្អែមប្រភេទទី ១ ដំបូងបំផុតលើពិភពលោក ដែលភ្ជាប់មកជាមួយឧបករណ៍តាមដានគ្លុយកូស និង ឧបករណ៍បូបអាំងស៊ុយលីន ពណ៌ផ្កាឈូក ដែលជាពណ៌អត្តសញ្ញាណរបស់តុក្កតានេះ។
បើតាម លោកស្រី Krista Berger អនុប្រធានជាន់ខ្ពស់នៃតុក្កតា Barbie និង ជាប្រធានតុក្កតាសកលបានឱ្យដឹងថា តុក្កតាបាប៊ីនេះនឹងជួយឱ្យកុមារទូទាំងពិភពលោក បានយល់ដឹងលឿនអំពីជំងឺទឹកនោមផ្អែមប្រភេទទី ១ ដោយឆ្លុះបញ្ចាំងពីស្ថានភាពវេជ្ជសាស្ត្រនៃជំងឺនេះ។ មានន័យថា តុក្កតាបាប៊ីកើតជំងឺទឹកនោមផ្អែម នឹងជាគំរូឱ្យកុមារបានឃើញពីស្ថានភាពនៅពេលកើតជំងឺទឹកនោមផ្អែម អាចឱ្យពួកគេស្រមៃពីរឿងរ៉ាវកើតឡើងជាមួយតុក្កតា ដែលពួកគេស្រលាញ់។
ជាក់ស្តែង នៅលើដៃតុក្កតាបាប៊ីមានពាក់នូវឧបករណ៍តាមដានគ្លុយកូស ដែលជួយគ្រប់គ្រងជំងឺទឹកនោមផ្អែមប្រភេទទី ១។ វាមានរាងបែបបេះដូងពណ៌ផ្កាឈូក។
ទន្ទឹមគ្នានេះ វាក៏មកជាមួយទូរស័ព្ទបាប៊ី ដែលមានកម្មវិធី CGM app សម្រាប់តាមដានកម្រិតជាតិស្ករក្នុងឈាម ដូចទៅនឹងឧបករណ៍តាមដានពិតរបស់មនុស្សផងដែរ។ វាតាមដានគ្លុយកូស ២៤ ម៉ោងក្នុងមួយថ្ងៃតាមរយៈ sensor នៅក្រោមស្បែក។
ចំពោះសម្លៀកបំពាក់របស់តុក្កតាវិញ ក្រុមហ៊ុនតុក្កតាបាប៊ីបានធ្វើការជាមួយអង្គការ Breakthrough T1D ដែលជាអង្គការស្រាវជ្រាវ និង តស៊ូមតិនៃជំងឺទឹកនោមផ្អែមប្រភេទទី 1 ឈានមុខគេនៅលើពិភពលោក។ ឈុតពណ៌ខៀវ និង បោះពុម្ពក្រឡាពងជីងចក់ពណ៌ស វាជានិមិត្តសញ្ញាសកល ដែលតំណាងឱ្យការយល់ដឹងអំពីជំងឺទឹកនោមផ្អែម។
បច្ចុប្បន្ន នៅសហរដ្ឋអាមេរិក អ្នកកើតជំងឺទឹកនោមផ្អែមប្រភេទទី ១ បានកើនឡើងគួរឱ្យកត់សម្គាល់ ដោយមានមនុស្សប្រមាណ ១,២៤ លាននាក់កំពុងរស់នៅជាមួយជំងឺនេះ ហើយគេបានប៉ាន់ប្រមាណថា វានឹងកើនឡើងដល់ ៥ លាននាក់នៅក្នុងឆ្នាំ ២០៥០៕
