ថ្មីៗនេះមាននារីម្នាក់មកពីប្រទេសអង់គ្លេស បានទម្លាយរឿងរ៉ាវរបស់នាងដែលបានកុម្ម៉ង់ខ្សែកអនឡាញពីចិនមក តែប៉ះបន្តោងមិនធម្មតា ចេះតែធុំក្លិនស្អុយភាយយ៉ាងចម្លែក ដល់ពិនិត្យមើលសព្វគ្រប់ទើបដឹងថាជាធ្មេញឆ្កែ។
នាងបានរៀបរាប់នៅតាមបណ្តាញសង្គម TikTok ថា នាងបានកុម្ម៉ង់ខ្សែកមួយខ្សែមកពី App ឈ្មោះ Temu របស់ចិន ហើយនៅពេលយកមកដល់នោះ បន្តោងរបស់វាហាក់ដូចជាមានក្លិនស្អុយយ៉ាងចម្លែក ក្នុងនោះនាងមិនអស់ចិត្តសោះ ដោយយកទៅដុតភ្លើងទៀតក៏មិនរលាយដែរ។
យ៉ាងណាមិញ នាងនៅតែពិនិត្យមើលវាម្តងហើយម្តងទៀត រហូតដល់ចុងក្រោយទើបដឹងថា បន្តោងនេះគឺជាធ្មេញរបស់សត្វឆ្កែពិតៗ វាមិនមែនជាធ្មេញជ័រនោះទេ ដែលធ្វើឱ្យនាងពិតជាមានការហួសចិត្ត និង ខ្ពើមរអើមខ្លាំងណាស់ ហើយក៏យករឿងនេះមកទម្លាយប្រាប់មហាជននៅតាមបណ្តាញ TikTok ។ ដោយឡែក មហាជនបានឃើញហើយក៏ហាក់រអើមដូចគ្នា ហើយអ្នកខ្លះទៀតក៏ប្រាប់ថាលែងហ៊ានកុម្ម៉ង់ទិញតាម App នេះតទៅទៀតហើយ៕
ប្រភព៖ Khaosod
