នៅរសៀលថ្ងៃទី ២៣ ខែឧសភា ឆ្នាំ ២០២៥ នេះ រដ្ឋបាលខណ្ឌទួលគោក បានជូនដំណឹងពីការស្វែងរកឪពុកម្តាយកុមារ ដែលត្រូវបានគេបោះបង់ចោល នៅមន្ទីរពេទ្យកុមារជាតិ។
តាមប្រភពបានបញ្ជាក់ឱ្យដឹងថា កាលពីថ្ងៃទី ១០ ខែមេសា ឆ្នាំ ២០២៥ វេលាម៉ោង ០៩:០០ នាទី មានករណីកុមារម្នាក់ឈ្មោះ វ៉ាលី រតនា ភេទ ប្រុស កើតថ្ងៃទី ០១ ខែកុម្ភៈ ឆ្នាំ ២០២៥ ត្រូវបានគេបោះបង់ចោលនៅមន្ទីរពេទ្យកុមារជាតិ សង្កាត់ទឹកល្អក់ទី ១ ខណ្ឌទួលគោក រាជធានីភ្នំពេញ។ ដើម្បីជួយសង្គ្រោះអាយុជីវិតកុមារ រដ្ឋបាលខណ្ឌទួលគោក បានសម្រេចទុកដាក់កុមារក្នុង អង្គការមិត្តសំឡាញ់ជាបណ្ដោះអាសន្នសិន អាស្រ័យហេតុនេះ បើសិនជាឪពុកម្តាយ ឬ សាច់ញាតិរបស់កុមារខាងលើជ្រាបជាដំណឹង សូមទាក់ទងទៅរដ្ឋបាលខណ្ឌទួលគោក ដែលមានសយដ្ឋាន អគារលេខ ១១៥ ផ្លូវលេខ ៥៩៦ សង្កាត់បឹងកក់ទី២ ខណ្ឌទូលគោក រាជធានីភ្នំពេញ តាមរយៈលេខទូរស័ព្ទ ០១២ ៨២១ ៩៧១ ដើម្បីទទួលកុមារយកទៅចិញ្ចឹមវិញ។
ក្នុងនោះ ដើម្បីជាសក្ខីភាពបញ្ជាក់ថាជាឪពុកម្តាយ ឬ អ្នកពាក់ព័ន្ធនឹងកុមារ សូមយកទៅជាមួយនូវលិខិតស្នាមផ្សេងៗ ដែលបញ្ជាក់ថាខ្លួនពិតជាឪពុកម្តាយបង្កើត ឬ សាច់ញាតិរបស់កុមារពិតប្រាកដមែន ។ ប្រសិនបើពុំមានឪពុកម្តាយ ឬសាច់ញាតិមកទទួលយកទៅចិញ្ចឹមវិញ ក្រោយរយៈពេល ៥ ខែបន្ទាប់ ពីថ្ងៃផ្សាយដំណឹងនេះ រដ្ឋបាលខណ្ឌទួលគោក នឹងសហការជាមួយអាជ្ញាធរពាក់ព័ន្ធដើម្បីរៀបចំផែនការអចិន្ត្រៃយ៍សម្រាប់កុមារដោយអនុវត្តន៍តាមច្បាប់ និង លិខិតបទដ្ឋានគតិយុត្តដែលមានចែងជាធរមាន៕
