ក្រោយពីប្រជាជនថៃបាននាំគ្នាផ្ទុះការមិនសុខចិត្ត រឿងដែលអះអាងថាមានអ្នកកែប្រែ Pin នៅក្នុង Google Map បង្ហាញពីប្រាសាទតាមាន់ធំ តាមាន់តូច តាក្របី នៅក្នុងទឹកដីប្រទេសកម្ពុជា ពេលនេះនាយកដ្ឋានផែនទីរបស់ថៃ ត្រៀមទាក់ទងទៅក្រុមហ៊ុន Google Map ឱ្យកែសម្រួលទិន្នន័យខ្សែបន្ទាត់ព្រំដែនឱ្យស្របទៅនឹងផែនទីដែលខ្លួនគូស ដោយត្រូវដាក់ប្រាសាទទាំង ៣ ស្ថិតក្នុងទឹកដីរបស់ខ្លួនវិញ។
ក្នុងនោះកងរាជអាវុធហត្ថរបស់ថៃ បានទាក់ទងទៅខាងនាយកដ្ឋានផែនទីយោធា ហើយពិនិត្យឃើញថា ខ្សែព្រំដែនដែលនៅក្នុង Google Map មិនត្រូវគ្នានឹងខ្សែបន្ទាត់ព្រំដែននៅលើផែនទី L7018 មានខ្នាត ១ លើ ៥០០០០ ដែលខ្លួនបានគូស និង បានប្រើប្រាស់សព្វថ្ងៃនេះ។ ដូចនេះហើយ នាយកដ្ឋានផែនទីរបស់ថៃ នឹងពិភាក្សាជាមួយតំណាងក្រុមហ៊ុន Google Map ដែលទទួលខុសត្រូវក្នុងការបង្កើតផែនទី ដើម្បីស្នើសុំកែសម្រួលខ្សែបន្ទាត់ព្រំដែនក្នុងកម្មវិធី Google Map ឱ្យស្របតាមផែនទីខ្នាត ១ លើ ៥០០០០ ដែលខ្លួនកំពុងប្រើវិញ។
លើសពីនេះទៀត នាយកដ្ឋានបានបញ្ជាក់ថា ការចុះអង្កេត និង បោះបង្គោលព្រំដែនកម្ពុជា-ថៃ នៅមិនទាន់បញ្ចប់នៅឡើយទេ ដូច្នេះហើយស្ថាប័នរដ្ឋាភិបាលថៃ នឹងប្រកាន់ខ្ជាប់នូវខ្សែបន្ទាត់ព្រំដែនកម្ពុជា-ថៃ ដូចមានចែងក្នុងផែនទីខ្នាត ១ លើ ៥០០០០ របស់នាយកដ្ឋានខ្លួន ដែលចែងថាទីតាំងប្រាសាទទាំង ៣ គឺស្ថិតនៅក្នុងទឹកដីរបស់ប្រទេសថៃ៕
ប្រភព៖ CH7
