នៅថ្ងៃទី ១ ខែកក្កដា ឆ្នាំ ២០២៥ នេះ តុលាការរដ្ឋធម្មនុញ្ញរបស់ប្រទេសថៃ បានសម្រេចផ្អាកដំណែងនាយករដ្ឋមន្រ្តី Paethongtarn ជាបណ្តោះអាសន្នហើយ ក្នុងករណីបែកធ្លាយសារសំឡេងជាមួយនឹងសម្តេច ហ៊ុនសែន។
តាមព័ត៌មានបានឱ្យដឹងថា ក្រោយពីមានការបែកធ្លាយសារសំឡេងជាមួយនឹងសម្តេចហ៊ុនសែន នាយករដ្ឋមន្រ្តី Paethongtarn ត្រូវប្រធានព្រឹទ្ធសភាដាក់ពាក្យប្តឹងទៅកាន់តុលាការរដ្ឋធម្មនុញ្ញឱ្យដកតំណែងចេញ ដោយអះអាងទង្វើនេះគឺជាទង្វើដែលឱ្យប៉ះពាល់ដល់ប្រទេសជាតិ។ យ៉ាងណាមិញ នៅថ្ងៃទី ១ ខែកក្កដា ឆ្នាំ ២០២៥ នេះ តុលាការរដ្ឋធម្មនុញ្ញក៏បានទទួលយកពាក្យបណ្តឹងនេះទៅពិចារណា ហើយសម្រេចផ្អាកលោកស្រី Paethongtarn ពីតំណែងនាយករដ្ឋមន្រ្តីចាប់ពីថ្ងៃនេះទៅ រហូតដល់ចេញការសម្រេចក្តី ដោយមានការបោះឆ្នោត ៧ ទល់នឹង ២។
ដោយឡែក លោកស្រី Paethongtarn នៅមិនទាន់លាចេញពីមុខតំណែងទាំងស្រុងទេ ប៉ុន្តែលោកស្រីនឹងត្រូវគេផ្អាកការងារទាំងឡាយជាបណ្តោះអាសន្នសិន ចំណែកតំណែងនាយករដ្ឋមន្រ្តីវិញ នឹងត្រូវឧបនាយករដ្ឋមន្ត្រីកាន់កាប់ជំនួសសិន៕
ប្រភព៖ Thairath
