ក្រោយពីបានបង្កការវាយប្រហារមកលើកម្ពុជាជាថ្មី នៅព្រឹកថ្ងៃទី ៨ ខែធ្នូ ឆ្នាំ ២០២៥ នេះ ខាងកងទ័ពអាកាសរបស់ថៃ បានបញ្ជាក់ឱ្យដឹងថាខ្លួនបានបញ្ចេញយន្តហោះ F-16 មកធ្វើការតទល់ជាមួយកម្ពុជា ដើម្បីការពារខ្លួន។
លោក Chakrit Thamwichai អ្នកនាំពាក្យកងទ័ពអាកាសរបស់ថៃបានអះអាងថា ប្រទេសថៃបានប្រើប្រាស់យន្តហោះ F-16 ដើម្បីវាយប្រហារគោលដៅយោធានៅក្នុងប្រទេសកម្ពុជា ដោយសារតែរកឃើញថាកម្ពុជាកំពុងចល័តអាវុធធុនធ្ងន់ ដាក់ពង្រាយកងទ័ព ដែលនេះចាត់ទុកថាជាការគំរាមកំហែងទៅដល់ប្រទេសថៃ។
លោក Chakrit Thamwichai បានបញ្ជាក់ឱ្យដឹងថា ប្រតិបត្តិការនេះដែរ បានធ្វើឡើងដោយសហការជាមួយកងកម្លាំងសុណារី ដែលគោលដៅគឺជាឃ្លាំងអាវុធ កងបញ្ជាការ និង ផ្លូវផ្សេងៗដែលគាំទ្រកម្ពុជា ហើយប្រទេសថៃបានបើកប្រតិបត្តិការនេះស្របតាមច្បាប់អន្តរជាតិ ដែលជាសិទ្ធិការពារខ្លួន និង ជាពិសេសគោលដៅខ្ពស់បំផុតរបស់ខ្លួនគឺរក្សាស្ថិរភាពក្នុងតំបន់ និងទប់ស្កាត់ស្ថានការកុំឱ្យធ្ងន់ធ្ងរជាងនេះ៕
