ក្រោយពីមានការចម្រូងចម្រាសរឿងដែលប្រជាជនថៃ នាំគ្នាចោទប្រកាន់មកលើកម្ពុជា ថាបានលួចបន្លំដាក់ឈុតថៃទៅក្នុងសម្បត្តិបេតិកភណ្ឌពិភពលោក ជាមួយនឹងពិធីរៀបអាពាហ៍ពិពាហ៍ ពេលនេះក្រសួងវប្បធម៌ថៃបានចេញមុខបញ្ជាក់ហើយ ថាមិនមែនជាការពិតនោះទេ។
ក្នុងនោះ លោក Prasop Riangngen រដ្ឋលេខាធិការអចិន្ត្រៃយ៍នៃក្រសួងវប្បធម៌របស់ថៃ បានឱ្យដឹងថា ក្រសួងវប្បធម៌បានស៊ើបអង្កេត និង រកឃើញថា ពាក្យចចាមអារ៉ាមដែលថាកម្ពុជានឹងដាក់បញ្ចូលឈុតថៃទៅក្នុងពិធីរៀបអាពាហ៍ពិពាហ៍ ហើយនឹងស្នើដាក់ជាបេតិកភណ្ឌពិភពលោកក្នុងអង្គការយូណេស្កូនោះ មិនមែនជាការពិតទេ។ អង្គការយូណេស្កូ បានឱ្យប្រទេសទាំងអស់កែប្រែស្នើព័ត៌មានថ្មីសម្រាប់ឆ្នាំ ២០២៥-២០២៦ ប៉ុន្តែនៅមិនទាន់មានព័ត៌មានបញ្ជាក់ថា កម្ពុជាបានបញ្ចូលឈុតថៃនៅក្នុងន័យណាមួយនៅឡើយទេ។
លោក Prasop Riangngen បានបញ្ជាក់ទៀតថា ប្រទេសថៃក៏បានស្នើដាក់ឈុតថៃជាបេតិកភណ្ឌវប្បធម៌អរូបីនៅឆ្នាំ ២០២៦ ខាងមុននេះដែរ ហើយពេលនេះកំពុងតែនៅក្នុងដំណើរការពិចារណារបស់អង្គការយូណេស្កូផងដែរ៕
ប្រភព៖ Dailynews
