នៅព្រឹកថ្ងៃទី ២៩ ខែកក្កដា ឆ្នាំ ២០២៥ នេះ អ្នកនាំពាក្យរាជរដ្ឋាភិបាល បានចេញសេចក្តីសង្ខេបព័ត៌មានស្តីពី «បច្ចុប្បន្នភាពជុំវិញកិច្ចចរចារបទឈប់បាញ់ជាបន្ទាន់ និង ឥតលក្ខខណ្ខរវាងកងទ័ពកម្ពុជា-ថៃ » នៅទីស្តីការគណៈរដ្ឋមន្ត្រី។
តាមរយៈសេចក្ដីសង្ខេបព័ត៌មាន នៅព្រឹកថ្ងៃទី ២៩ ខែកក្កដា ឆ្នាំ ២០២៥ នេះ លោកជំទាវ ម៉ាលី សុជាតា អ្នកនាំពាក្យក្រសួងការពារជាតិ បានបញ្ជាក់ឱ្យបានដឹងថា កិច្ចប្រជុំក្រៅផ្លូវការ នៃមេបញ្ជាការភូមិភាគ ដែលនៅក្នុងនោះមាន ភូមិភាគទី ១ ភូមិភាគទី ២ និង បញ្ជាការដ្ឋានការពារព្រំដែនចន្ទបុរី និង ខេត្តត្រាត របស់ភាគីថៃ និង ជួបប្រជុំគ្នាជាមួយយោធភូមិភាគទី ៤ ទី ៥ និង មេបញ្ជាការភូមិភាគ ៣ ភាគីខាងប្រទេសកម្ពុជាយើង។
លោកជំទាវបានបញ្ជាក់ពីកិច្ចប្រជុំដូចខាងក្រោម ៖
– ចាប់ពីវេលាម៉ោង ៧៖០០ នាទី ថ្ងៃទី ២៩ ខែកក្កដា ឆ្នាំ ២០២៥ នេះ គឺមានដំណើរការនៃកិច្ចប្រជុំថ្នាក់ភូមិភាគរួចទៅហើយ ដែលក្នុងនោះអ្នកនាំពាក្យបានជម្រាបជូនថា ម៉ោងនេះ គឺយោធភូមិភាគទី ៥ កម្ពុជា បានកំពុងជួបប្រជុំពិភាក្សាគ្នា ជាមួយយោធភូមិភាគទី ១ ថៃ នៅទីតាំងក្បាលស្ពាន ដែលចាប់ផ្ដើមតាំងពីម៉ោង ៧៖០០ នាទីព្រឹក មកម្ល៉េះ។
– ចំពោះយោធភូមិភាគទី ៤ កម្ពុជា និង យោធភូមិភាគទី ៤ ថៃ នឹងមានការជួបប្រជុំគ្នានៅអូរស្មាច់ នៅវេលាម៉ោង ១០៖០០ នាទី។
– រួមជាមួយគ្នានេះផងដែរ ក៏មានការប្រជុំគ្នាជាមួយនឹងមេបញ្ជាការភូមិភាគ ៣ កម្ពុជា និង បញ្ជាការដ្ឋានព្រំដែនចន្ទបុរី និង ត្រាត ជាកិច្ចប្រជុំតាមរយៈ Zoom នៅវេលាម៉ោង ៩ នេះ៕
