តាមរយៈរូបភាព សាលាឆទាន កំពង់អុស ស្ថិតនៅខេត្តកណ្ដាល ដែលបង្ហោះដោយទំព័រហ្វេសប៊ុក Archesthetic បានកំពុងធ្វើឱ្យមហាជនផ្ទុះការសរសើរជាបន្តបន្ទាប់ ហើយក៏មោទកភាពជាខ្លាំង ដែលនេះជាស្នាដៃស្ថាបត្យកម្មបង្កើតឡើងដោយកូនខ្មែរពិតៗ។
យោងតាមការលម្អិត សាលាឆទាន កំពង់អុស នេះ ជាស្នាដៃមួយទៀតរបស់ លោក អ៊ុនផេង ពុធវិសាល ជាស្ថាបត្យករខ្មែរដ៏ឆ្នើម ជាប្រធានសមាគមស្ថាបត្យករខ្មែរ(AAK) និង ជាស្ថាបនិកក្រុមហ៊ុន Archicam កំពុងមានឈ្មោះបោះសំឡេងគួរឱ្យកត់សម្គាល់។
សាលាឆទាន កំពង់អុស គឺជាការបំផុសគំនិតឡើង រួមបញ្ចូលដោយមរតកសម័យបុរាណ និង ការច្នៃប្រឌិតនាសម័យបច្ចុប្បន្ន ស្ថិតនៅស្រុកពញាឮ ខេត្តកណ្ដាល។ ស្ថាបត្យករបានរចនា ដោយមានស្លាបគ្របពីលើសំណង់នៅជុំវិញស្រះទឹកទំហំ 50x50m ដំបូលទ្រេត 8 ដឺក្រេ ផ្ដល់ភាពទាក់ទាញ និង ដើម្បីកាត់បន្ថយកម្ដៅពន្លឺព្រះអាទិត្យផ្ទាល់ និង រក្សាសីតុណ្ហភាពក្នុងលំហ ដោយមិនចាំងភ្នែកអ្នកប្រើប្រាស់។
ស្ថាបត្យកម្មនេះរំលេចចេញបាននូវភាពទាក់ទាញនៃសិល្បៈ ដោយសារតែការប្រើប្រាស់សម្ភារៈសំណង់ដែលសាមញ្ញបំផុត ដែលមានប្រភពក្នុងស្រុក បង្កប់នូវអត្ថន័យរួមនៃវប្បធម៌ប្រពៃណីខ្មែរ។
តាំងពីការប្រើប្រាស់ព្រួលឫស្សី ស្លឹកឃុនមារ កំប្លោក ឈើគគីរ កន្ទេលផ្អាវ និង ថ្មព្រះនេត្រព្រះ ដែលស្ដែងចេញពីគុណតម្លៃនៃស្ថាបត្យកម្ម និង ជួយលើកស្ទួយជីវភាពប្រជាជនក្នុងសហគមន៍ផងដែរ។
គន់សម្រស់គ្រប់ជ្រុង សាលាឆទាន កំពង់អុស ជាទីតាំងមួយ ដែលមានស្ថាបត្យកម្មដ៏អស្ចារ្យ និង ស្រស់ស្អាត រួមបញ្ចូលផ្ទៃបៃតងធម្មជាតិ និង បរិយាកាសត្រជាក់ត្រជំ៕
