មហាជនអ្នកគាំទ្រកញ្ញា Nikki Nikki ច្បាស់ជាបានជ្រាបហើយថា តារាចម្រៀងស្រីរូបនេះ មិនមែននៅទំនេរនោះទេ ពោលគឺកញ្ញា Nikki Nikki មានម្ចាស់ចិត្តរួចហើយ ដោយគូស្នេហ៍របស់នាង ជាអ្នកថតរូបល្បីឈ្មោះមួយរូបគឺ លោក Matt Baddley។
យ៉ាងណាក៏ដោយ កន្លងមក ទំនាក់ទំនងរបស់កញ្ញា Nikki Nikki និង គូស្នេហ៍ ក៏មិនសូវបង្ហាញជាញឹកញាប់លើបណ្តាញសង្គមនោះឡើយ ក៏ព្រោះតែម្នាក់ៗសុទ្ធតែរវល់រៀងៗខ្លួន។ តែយ៉ាងណាក៏ដោយ បើនិយាយពីការងារវិញ កញ្ញា Nikki Nikki តែងតែទទួលបានការជួយ និង ផ្តល់យោបល់ពីក្រោយជានិច្ចពីមិត្តប្រុស។
បើគិតមកដល់ខែតុលា ឆ្នាំ ២០២៥ ខាងមុខនេះ រយៈពេលជិត ១០ ឆ្នាំហើយ ដែលកញ្ញា Nikki Nikki និង អ្នកថតរូបជំនាញលោក Matt បានសាងចំណងស្នេហ៍នឹងគ្នាយ៉ាងចាស់ទុំ បើទោះជា អ្នកទាំង ២ មានចំណុចមួយចំនួនខុសគ្នាក៏ដោយ ។ ក្នុងនោះ ខួបស្នេហ៍ ១០ ឆ្នាំ កាន់តែខិតជិតមកដល់ ស្រាប់តែកញ្ញា Nikki Nikki បានបង្ហោះវីដេអូទម្លាយពីចំណងស្នេហ៍របស់អ្នកទាំង ២ ក៏ដូចជាបទពិសោធកាន់តែច្រើន ពីទំនាក់ទំនងរវាងមនុស្ស ២ នាក់ ដែលមានសញ្ជាតិ ចំណង់ចំណូលចិត្ត និង អ្វីជាច្រើនខុសពីគ្នា តែអាចរក្សាចំណងស្នេហ៍នឹងគ្នាបាន។
ក្នុងចំណុចជាច្រើនដែលកញ្ញា Nikki Nikki លើកមកចែករំលែកនោះ មានមួយចំណុចដែលធ្វើឱ្យមហាជនចាប់អារម្មណ៍ខ្លាំង គឺពេលខ្លះពួកគេធ្វើចរិតកូនក្មេង សំឡេងម្ញ៉ិកម្ញ៉ក់ដាក់គ្នាទៅវិញទៅមក ដែលនេះជាចំណុចមួយបង្ហាញថា ចំណងស្នេហ៍នៅតែមានសុខភាពល្អ និង រឹងមាំ៕
