ក្បាច់ខ្មែរពីចម្លាក់ប្រាសាទនានា ឱ្យតែយកមកបញ្ចូលក្នុងការច្នៃប្រឌិតបែបថ្មី តែងធ្វើឱ្យរបស់នោះ មានភាពប្រណីត ទាក់ទាញ និង ស៊ីវិល័យខ្លាំង។ តួយ៉ាង ចំណោមម៉ាកហ្វេហ្សិនក្នុងស្រុក ក្នុងនោះគេបានចាប់អារម្មណ៍ទៅលើម៉ាកនាឡិកាចំនួនពីរ ដែលបានយកក្បាច់ខ្មែរមករចនា បង្កើតជាខូឡិកហ្សិននាឡិកាបែបទំនើប ជាមួយគុណភាពខ្ពស់ និង ប្រណីតភាព មិនចាញ់ម៉ាកល្បីៗនៅបរទេស។
១. ម៉ាក PU
ជាម៉ាកយីហោក្នុងស្រុក បង្កើតឡើងនៅឆ្នាំ ២០១៨ ពូ ជាម៉ាកនាឡិកាប្រណីតដំបូងគេនៅកម្ពុជា។ នាឡិកានេះមានស្ទីលបែបក្លាសិក ដោយបញ្ចូលក្បាច់ខ្មែរ ដកស្រង់ពីប្រាសាទនានា ហើយរាល់ខូឡិកហ្សិនតែងផលិតលក្ខណៈពិសេសបំផុត និង មានចំនួនកំណត់។ ដោយសារភាពលម្អិត និង ប្រណីតឥតខ្ចោះ នាឡិកាម៉ាក ពូ មានទីផ្សារទាំងក្នុង និង ក្រៅប្រទេស។ ឯតម្លៃវិញចាប់ពីខ្ទង់ពាន់ដុល្លារដល់ម៉ឺនដុល្លារ។
២. ម៉ាក VARMAN
ម៉ាកនេះកំពុងទទួលបានការចាប់អារម្មណ៍ខ្លាំងពីសំណាក់យុវវ័យ ដោយហេតុម៉ូដមានលក្ខណៈទំនើប ដោយរួមបញ្ចូលក្បាច់ខ្មែរនៅលើមុខនាឡិកា និង ប្រើលេខខ្មែរនៅលើម៉ោងផងដែរ។ ម៉ាកនេះក៏ធ្លាប់បញ្ចេញខូឡិកហ្សិកនាឡិកាក្បាច់ខ្មែរដ៏ពិសេស ដូចជា ឌឹកិត្តិមុខ (The Ketemok) និង ឌឹអប្សរាអង្គរ (The Apsara Angkor) ជាដើម។ ចំណែកតម្លៃវិញសមរម្យ ចាប់ពីជាង ១០០ ដុល្លារ ដល់ ជិត ៨០០ ដុល្លារ៕
