ថ្មីៗនេះ លោក Boonsin Padklang មេទ័ពភូមិភាគ ២ របស់ថៃ ហាក់កាន់តែបានសម្តីក្អេងក្អាងលើការកាន់កាប់ប្រាសាទរបស់ខ្មែរ ដោយដំបូងឡើយសុទ្ធតែស្វាមគន៍អ្នកទេសចរជនជាតិខ្មែរឱ្យមកលេងប្រាសាទរបស់ថៃ តែត្រូវគោរពច្បាប់របស់ថៃ ដល់ឥឡូវហ៊ានបោះសម្តីថានឹងបិទប្រាសាទតាមាន់ធំចំនួន ៧ ថ្ងៃទៀត បើសិនជាអ្នកទេសចរខ្មែរឡើងមកបង្ករឿង។
លោក Boonsin Padklang បានឱ្យដឹងថា ខ្លួននឹងបញ្ជាឱ្យបិទប្រាសាទតាមាន់ធំ ៧ ថ្ងៃភ្លាមៗ ដើម្បីរៀបចំសណ្តាប់ធ្នាប់ឡើងវិញ បើសិនជាមានការរំខាន ឬ ការប្រវាយប្រតប់ឈ្លោះទាស់ទែងណាមួយកើតឡើង។ លោកបានឱ្យដឹងទៀតថា អាជ្ញាធរនៅតំបន់ប្រាសាទមានផែនការបន្ទាន់ដើម្បីឆ្លើយតបចំពោះហេតុការណ៍ទាំងនោះរួចហើយ ប៉ុន្តែបច្ចុប្បន្ននៅមិនទាន់មានអ្វីគួរឱ្យបារម្ភកើតឡើងឡើយ។
លោក Boonsin Padklang បានបន្តថា កម្ពុជាត្រូវតែគ្រប់គ្រងអ្នកទេសចររបស់ខ្លួនឱ្យបាន បើមិនបានទេ នឹងមានការបិទប្រាសាទហើយ ហើយកម្ពុជាគួរតែរើសអ្នកទេសចរឱ្យមែនទែន មុននឹងឱ្យមកទស្សនាប្រាសាទ កុំឱ្យមានករណីដូចស្រ្តីដែលចង្អុលមុខទាហានថៃ និង ក្រុមក្មេងស្ទាវនោះទៀត។ លើសពីនេះ គួរតែកំណត់អ្នកទេសចរមិនឱ្យលើសពី ១០០ នាក់ក្នុងមួយថ្ងៃ៕
ប្រភព៖ CH7
