លើកនេះ KFC លេងមែនទែន មិនមែនចេញមាន់បំពងរសជាតិថ្មី តែចេញថ្នាំដុសធ្មេញរសជាតិមាន់បំពងវិញ។ តាមការចុះផ្សាយរបស់ New York Post ថ្នាំដុសធ្មេញរសជាតិនេះ ត្រូវបានបំផុសគំនិតពីមឺនុយមាន់បំពង KFC’s 11 herbs and spices។
ការប្រកាសព័ត៌មានរបស់ KFC ដែលមានមូលដ្ឋាននៅរដ្ឋ Kentucky សហរដ្ឋអាមេរិកបានឱ្យដឹងថា៖«ពេលប្រើថ្នាំដុសធ្មេញនេះ យើងនឹងមានអារម្មណ៍ដូចបានខាំមាន់បំពង ដែលក្តៅៗ និង រសជាតិខ្ទិះ(juicy) ដែលវានឹងស្រោបធ្មេញប្រកបដោយរសជាតិឆ្ងាញ់ មុនពេលធ្វើឱ្យមាត់មានអារម្មណ៍ស្រស់ថ្លា និង ស្អាត។
ដើម្បីបង្កើតថ្នាំដុសធ្មេញរសជាតិមាន់បំពង KFC បានចាប់ដៃគូជាមួយក្រុមហ៊ុនផលិតថ្នាំដុសធ្មេញ Hismile ដើម្បីបង្ហាញផលិតផលអនាម័យមាត់ធ្មេញថ្មីបំផុត ក្នុងរយៈពេលកំណត់មួយ។ ថ្នាំដុសធ្មេញត្រូវបានដាក់លក់ផ្តាច់មុខនៅលើគេហទំព័រ Hismile ក្នុងតម្លៃ ១៣ ដុល្លារ ហើយវាត្រូវបានលក់អស់ក្នុងរយៈពេលដ៏ខ្លី កាលពីដើមខែមេសា។ ក្រៅពីថ្នាំដុសធ្មេញ KFC ក៏បានបញ្ចេញច្រាសដុសធ្មេញអេឡិចត្រូនិច ដែលដាក់លក់ក្នុងតម្លៃ ៥៩ ដុល្លារផងដែរ៕
