នៅព្រឹកថ្ងៃទី ១៤ ខែមីនា ឆ្នាំ ២០២៥ នេះ ស្នងការដ្ឋាននគរបាលខេត្តកណ្ដាល បានចេញសេចក្តីបំភ្លឺព័ត៌មាន ទាក់ទងទៅនឹងករណីបុរសម្នាក់ថា ត្រូវបានជនសង្ស័យមួយក្រុម (ប្លន់) យកប្រាក់ដុល្លារចំនួន ៦០០ ដុល្លារ ប្រាក់រៀលចំនួន ១៦ ម៉ឺនរៀល ខ្សែក និង ចិញ្ចៀន នៅតាមបណ្តោយផ្លូវក្រវ៉ាត់ក្រុងទី ៣ ស្ថិតក្នុងភូមិលេខ ៥ សង្កាត់ស្វាយរលំ ក្រុងតាខ្មៅ ខេត្តកណ្តាល។
ក្រោយពីទទួលបានព័ត៌មាននេះ លោកឧត្តមសេនីយ៍ទោ ឈឿន សុចិត្ត ស្នងការនគរបាលខេត្ត បានបញ្ជាកម្លាំងជំនាញ និង សមត្ថកិច្ចមូលដ្ឋានធ្វើការស្រាវជ្រាវករណីនេះ បន្ទាប់ពីធ្វើការស្រាវជ្រាវយ៉ាងយកចិត្តទុកដាក់ ទើបដឹងថា បុរសឈ្មោះ សុខ មករា បានប្រឌិតរឿងថាមានករណីចោរប្លន់លើខ្លួន ហើយមូលហេតុនៃការប្រឌិតរឿងនេះ តាមការបំភ្លឺរបស់ឈ្មោះ សុខ មករា បានឱ្យដឹងថា ៖ «មូលហេតុដោយសារខ្លួនបានឈរឈ្មោះជំនួសមិត្តភក្តិបានខ្ចីប្រាក់អង្គការនៅក្នុងរោងចក្រ ចំនួន ៥៨០ ដុល្លារ ហើយមិត្តភក្តិមិនសងអង្គការ គេចខ្លួនទៅរស់នៅប្រទេសថៃ ទើបខ្លួនគ្មានប្រាក់ទើបយកខ្សែក ចិញ្ចៀន លក់នៅក្នុងផ្សារតាខ្មៅ បានប្រាក់ចំនួន ៤០០ ដុល្លារបូកជាមួយប្រាក់បងស្រីចំនួន ២០០ ដុល្លារ ផ្ញើឱ្យយកទៅបង់ធនាគារ យកទៅសងអង្គការ។ រួចនៅថ្ងៃទី ១១ ខែមីនា ឆ្នាំ ២០២៥ ម៉ោង ១៣ និង ០០ នាទី ខ្លូនបានជិះម៉ូតូមករកទិញអីហូបនៅក្រុងតាខ្មៅ រហូតដល់ម៉ោង ១៨ និង ៥០ នាទី ទើបជិះម៉ូតូតាមផ្លូវក្រវ៉ាត់ក្រុងឆ្ពោះទៅផ្ទះជួលនៅភូមិឬស្សីស្រុក ឃុំឈើទាល ស្រុកកៀនស្វាយ វិញ ក៏ប្រឌិតរឿងភូតកុហកអ្នកសារព័ត៌មានថា មានជនសង្ស័យមួយក្រុមមានគ្នាចំនួន ០៦ នាក់ ភេទប្រុសជិះម៉ូតូចំនួន ០៣ គ្រឿង និង អ្នកជិះពីក្រោយបានយកកាំបិតចុងស្រួចមកភ្ជង់ចំក្បាលពោះរបស់ខ្លួន ហើយគំរាមឱ្យដកប្រាក់ចេញពីក្នុងកាបូប ប្រាក់ដុល្លារចំនួន ៦០០ ដុល្លា ប្រាក់រៀលចំនួន ១៦ ម៉ឺនរៀល ដោះខ្សែក និង ដោះចិញ្ចៀន ទៅយកឱ្យក្រុមជនសង្ស័យទាំងនោះ រួចនាំគ្នាជិះម៉ូតូគេចខ្លួន»។
បច្ចុប្បន្ន ជនសង្ស័យ ត្រូវបានកម្លាំងជំនាញកសាងសំណុំរឿងចាត់ការតាមនីតិវិធី៕
ប្រភព ៖ ស្នងការដ្ឋាននគរបាលខេត្តកណ្ដាល
