តាមរយៈវេជ្ជបណ្ឌិត Jamin Vinod Brahmbhatt ជាសមាជិកនៃគ្លីនិក orlando health medical group urology pur clinic នៅសហរដ្ឋអាមេរិក សិច ឬ ការរួមភេទ គឺជាវិធីដ៏ល្អបំផុតក្នុងការរំដោះស្ត្រេស ហើយបើតាមការសិក្សាអំពីអត្ថប្រយោជន៍នៃសិច ឬ ការរួមភេទ មានផលវិជ្ជមានចំពោះការបំពេញការងារ ធ្វើឱ្យសកម្ម និង ជោគជ័យឆាប់រហ័ស។
សាកលវិទ្យាល័យ Oregon State University នៅសហរដ្ឋអាមេរិក បានធ្វើការសិក្សាស្រាវជ្រាវទៅលើប្តីប្រពន្ធចំនួន ១៥៩ គូ ដែលពួកគេសុទ្ធតែបម្រើការងារនៅអូហ្វីស។ គេបានប្រើពេលពីរសប្តាហ៍ និង រៀងរាល់ថ្ងៃដើម្បីស្ទង់មតិ ដោយផ្តោតលើប្រធានបទ From the Bedroom to the office ឬ ពីបន្ទប់គេងទៅការិយាល័យ។
ជាលទ្ធផល បុគ្គលិកបម្រើការងារដែលបានរួមភេទរៀងរាល់ថ្ងៃ រយៈពេលពីរសប្តាហ៍ ពួកគេមានអាកប្បកិរិយាវិជ្ជមានជាងសព្វដងសម្រាប់ថ្ងៃបន្ទាប់។ មានន័យថា កាលណាពួកគេបានរួមភេទ ពួកគេមានអារម្មណ៍ល្អនៅពេលព្រឹក ហើយថែមទាំងជួយរក្សាអារម្មណ៍ល្អបានពេញមួយថ្ងៃ ជាពិសេសបំពេញការងារសកម្ម និង ឆាប់មានប្រសិទ្ធភាព។ មួយវិញទៀត អ្នកស្រាវជ្រាវរកឃើញថា ពេលបានរួមភេទ ពួកគេនឹងដេកស្កប់ល្អ ធ្វើឱ្យចំណងអាពាហ៍ពិពាហ៍កាន់តែស្អិតល្មួត។ និយាយរួម រៀងរាល់ថ្ងៃ វាមានប្រសិទ្ធភាពដល់ ២៤ ម៉ោងតែម្តង។
អ្នកដឹកនាំការស្រាវជ្រាវ លោក Keith Leavitt នៅសាកលវិទ្យាល័យ Oregon State University បានក្រើនរំឭកដែរថា ការរួមភេទមានអត្ថប្រយោជន៍ខាងសង្គម អារម្មណ៍ និង សរីរវិទ្យា ហើយវាជារឿងសំខាន់ដែលគ្រប់គ្នាគួរតែធ្វើជាអាទិភាព។ ដូច្នេះមិនថារវល់យ៉ាងណា គួរតែបង្កើតពេលវេលាដើម្បីវា។
ខណៈសិចអាចជំរុញដល់ការបំពេញការងារ ដោយឡែកគ្នានេះ តាមការសិក្សាបានរកឃើញថា ការងារអាចមានផលអវិជ្ជមានចំពោះជីវិតសិចវិញ។ ជាក់ស្តែង នៅពេលធ្វើការទាក់ទងនឹងស្ត្រេស ឬ ភាពតានតឹង វានឹងក្លាយជាផ្នែកដ៏ធំ ដែលប៉ះពាល់ដល់ជីវិតក្តីសុខនៅផ្ទះ។ វាអាចប៉ះពាល់ដល់ជីវិតសិច រួមទាំងពាក់ព័ន្ធបន្តទៅនឹងផលិតភាពការងារផងដែរ។
ចុះហេតុអ្វីបានជាសិចមានសារសំខាន់យ៉ាងនេះ? ពិតប្រាកដណាស់ វាមិនត្រឹមតែមានផលល្អចំពោះការងារប៉ុណ្ណោះទេ តែថែមទាំងល្អចំពោះអារម្មណ៍ទូទៅ សង្គម និង ផ្លូវចិត្តផងដែរ។ សិច ឬ ការរួមភេទធ្វើឱ្យយើងបញ្ចេញអ័រម៉ូនរីករាយម្យ៉ាងហៅថា dopamine ជាការបញ្ចេញម៉ូលេគុលណឺរ៉ូនបញ្ជូនទៅសរសៃប្រសាទខួរក្បាល (neurotransmitter) ដែលគ្រប់គ្រងអារម្មណ៍រំភើប និង អារម្មណ៍រីករាយដែលទទួលបាននៅក្នុងខួរក្បាល។ សកម្មភាពរាងកាយនេះ គឺជាការជំរុញអារម្មណ៍ធម្មជាតិតាមបែបវិទ្យាសាស្ត្រ។
ជាចុងក្រោយ ដំបូន្មានពីការសិក្សាខាងលើ ការភ្ជាប់ទំនាក់ទំនងគ្នារវាងចិត្ត និង រាងកាយ ពិតជាមានសារសំខាន់សម្រាប់កន្លែងធ្វើការ និង ជីវិតនៅផ្ទះ។ ដូច្នេះមនុស្សគ្រប់គ្នាគប្បីបែងចែកពេលវេលាឱ្យស្មើ មានទាំងពេលវេលាធ្វើការងារផង និង ពេលវេលាសិចជាមួយដៃគូផងដែរ៕
ប្រភព៖ olandohealth
