ថ្មីៗកន្លងទៅនេះ មហាជនតៃវ៉ាន់មានការហួសចិត្តជាខ្លាំងទៅលើរឿងរ៉ាវរបស់បុរសម្នាក់ ដែលទៅលួចធាតុឪពុករបស់សង្សារចាស់ ហើយគំរាមយកទៅបោះចោល ដើម្បីបង្ខំឱ្យនាងមកត្រូវគ្នាជាមួយខ្លួនវិញ ព្រោះតែអស់ជម្រើសរកផ្លូវជានាជាមួយនាងមិនបាន។
តាមព័ត៌មានបានឱ្យដឹងថា បុរសរូបនេះមានវ័យ ៥៧ ឆ្នាំ ជាម្ចាស់កសិដ្ឋានចិញ្ចឹមមាន់នៅទីក្រុង New Taipei ប៉ុន្តែជំពាក់បំណុលគេច្រើន ហើយតែងតែយកលុយអ្នកផ្ទះមកដោះស្រាយជារឿយៗ។ បុរសរូបនេះក៏ធ្លាប់មានទំនាក់ទំនងស្នេហាជាមួយស្រ្តីម្នាក់វ័យ ៤៧ ឆ្នាំ អស់រយៈពេល ១៥ ឆ្នាំ ដែលនៅក្នុងឆ្នាំ ២០២៣ នាងក៏បានសុំបុរសនេះបែកគ្នា និង ផ្តាច់ការទាក់ទងទាំងអស់ ដោយសារតែឃើញថាបុរសនេះគ្មានអនាគត។
យ៉ាងណាមិញ បុរសនេះមិនព្រមទទួលការសុំបែកនេះឡើយ និងបានព្យាយាមធ្វើរឿងគ្រប់យ៉ាងដើម្បីឱ្យស្រ្តីជាសង្សារមកត្រូវគ្នាវិញ តែការព្យាយាមជាង ១ ឆ្នាំមិនបានសម្រេចសោះ ទើបចុងក្រោយក៏បែកគំនិតទៅគាស់ផ្នូរលួចធាតុរបស់ឪពុកនាងដើម្បីមកគំរាមវិញ។
ដោយឡែក ស្រ្តីខាងលើក៏បានប្តឹងប៉ូលិស ដែលប៉ូលិសក៏បានស៊ើបអង្កេត និង ពិនិត្យរកភស្តុតាងឃើញថាបុរសនេះពិតជាបានលួចធាតុរបស់ឪពុកនាងចេញពីកន្លែងផ្នូរពិតមែន រួចក៏បានធ្វើការឃាត់ខ្លួន និង កាត់ទោសតាមបទចោទពាក់ព័ន្ធនឹងការបំផ្លិចបំផ្លាញ ឬលួចធាតុ និង អីវ៉ាន់ក្នុងបុណ្យសព រួមទាំងការគំរាមកំហែង និងការបំភិតបំភ័យ ដែលជាបទល្មើសព្រហ្មទណ្ឌ៕
ប្រភព៖ Kapook
