នៅថ្ងៃទី ៣ ខែកញ្ញា ឆ្នាំ ២០២៥ នេះ សារព័ត៌មានក្នុងស្រុករបស់ថៃ បានរាយការណ៍ឱ្យដឹងថា ទឹកជំនន់បានកំពុងជន់លិចទៅដល់ខេត្តលើយហើយ ដែលបង្កពីភ្លៀងខ្លាំងប៉ុន្មានថ្ងៃកន្លងទៅនេះ ជាហេតុបណ្តាលឱ្យផ្ទះសម្បែងប្រជាជនជាច្រើនខ្នងលិចបាត់ទៅក្នុងទឹកតែម្តង។
តាមព័ត៌មានបានឱ្យដឹងថា ទឹកជំនន់នេះបានចេញពីទន្លេលើយ ដែលកំពុងតែឡើងខ្លាំងដោយសារតែភ្លៀងធ្លាក់ជាបន្តបន្ទាប់កាលពីថ្ងៃទី ៣០ និង ៣១ ខែសីហា ឆ្នាំ ២០២៥ កន្លងទៅនេះ។ ក្នុងនោះស្រុកដែលកំពុងរងការប៉ះពាល់ខ្លាំងជាងគេរួមមានស្រុកភូលួង ស្រុកវ៉ាងសាភុង និង ស្រុកមឿងឡៅឡី ដោយមានយ៉ាងហោចណាស់ផ្ទះសម្បែងចំនួន ៧៩២ កំពុងត្រូវជន់លិច។
យ៉ាងណាមិញ អភិបាលខេត្តលើយ និងស្ថាប័នពាក់ព័ន្ធមួយចំនួនបានផ្តល់ជំនួយ ដោយបាននាំយកគ្រឿងឧបភោគបរិភោគ និងថ្នាំពេទ្យ ដល់ផ្ទះប្រជាពលរដ្ឋរងគ្រោះទឹកជំនន់ ហើយក៏កំពុងស្វះស្វែងបន្តបូមទឹកចេញផងដែរ៕
ប្រភព៖ Khaosod
