ជារឿងមួយដែលគួរឱ្យហួសចិត្ត និងអស់សំណើចជាខ្លាំងដែលមានបុរសម្នាក់ខំតែងខ្លួនធ្វើជាអ្នកទោស ទៅជប់លៀងថ្ងៃបុណ្យហាឡូវីន មានអីស្រាប់តែត្រូវប៉ូលិសឃាត់ខ្លួនមែនទែន។
តាមព័ត៌មានបានឱ្យដឹងថា បុរសខាងលើនេះមានវ័យ ១៨ ឆ្នាំ ឈ្មោះថា Jimmy Glover ជាជនជាតិអាមេរិក។ នៅថ្ងៃទី ៣១ ខែតុលា ឆ្នាំ ២០២៥ កន្លងទៅ ដែលជាថ្ងៃបុណ្យហាឡូវីន Jimmy បានស្លៀកពាក់តែងខ្លួនជាអ្នកទោស រួចទៅជប់លៀងមួយអស់ដៃ ស្រាប់តែពេលត្រឡប់មកវិញនៅម៉ោងប្រមាណ ៦ ព្រឹកថ្ងៃបន្ទាប់ Jimmy ក៏ត្រូវបានប៉ូលិសឃាត់ខ្លួននៅតាមផ្លូវដោយអះអាងថា បានស្រវឹងហើយបើកបរ។
ប៉ូលិសបានឱ្យ Jimmy ចុះមកពីឡាន ដើម្បីត្រួតពិនិត្យអាការស្រវឹង ហើយក៏ត្រូវប៉ូលិសចោទប្រកាន់ពីបទស្រវឹងបើកបរ និងបដិសេធការត្រួតពិនិត្យ ហើយក៏បានឃាត់ខ្លួនទៅដំណើរការក្តីតាមផ្លូវច្បាប់។ យ៉ាងណាមិញ ប៉ូលិសបានយកវីដេអូរបស់ Jimmy មកផុសនៅតាមបណ្តាញសង្គមបែបលេងសើចថា ឈុតស្លៀកពាក់របស់ Jimmy គឺដូចជាត្រៀមរួចរាល់សម្រាប់ការឃាត់ខ្លួនតែម្តង រីឯអ្នកដែលតែងខ្លួនជាប៉ូលិសក៏គួរតែមកជួយគ្នាធ្វើតួនាទីផង។ ដោយឡែក ចុងក្រោយ Jimmy ត្រូវបានគេធានាខ្លួនក្នុងតម្លៃ ១៥០០ ដុល្លារ ក្រោយពីឃាត់ខ្លួនបានអស់រយៈ ១០ ម៉ោង៕
ប្រភព៖ NYPOST
