ដាច់ឆ្នាំ ២០២៤ ចូលដល់ជាងពាក់កណ្តាលឆ្នាំ ២០២៥ ហើយ អ្វីដែលធ្វើទៅល្អពីឆ្នាំចាស់ គួរតែបន្តអភិវឌ្ឍន៍បន្ថែមទៀតនៅឆ្នាំថ្មី រីឯអ្វីដែលមិនល្អ គួរតែទទួលស្គាល់ និង កែប្រែដើម្បីឱ្យជីវិតរស់នៅកាន់តែប្រសើរឡើង។ យើងសូមលើកពីអត្តចរិត និង អាកប្បកិរិយា ៥ យ៉ាង ដែលអ្នកមិនគួរស្ពាយវាបន្តទៀត ពុំដូច្នោះជីវិតអ្នកនឹងមិនប្រសើរ ហើយថែមទាំងគ្មានអ្នករាប់រកទៀត។
១. ធ្វេសប្រហែសក្នុងទំនាក់ទំនង
មិនថាមិត្តភក្តិ ក្រុមគ្រួសារ ឬស្នេហា បើអ្នកបន្តធ្វើសកម្មភាពទាំងនេះ នោះទំនាក់ទំនងនឹងមិនរលូនបន្តទៀត ឬអាចកាត់ផ្តាច់តែម្តង។ រាប់តាំងពីការមិនឆ្លើយតបសារ ព្រងើយកន្តើយនឹងសារ មិនខលទំនាក់ទំនង មិនភ្ជាប់ការសន្ទនាគ្នា មិនខ្ចីជួបមុខ ដែលទាំងនេះធ្វើឱ្យពួកគេមានអារម្មណ៍ថាខ្លួនមិនសំខាន់ចំពោះអ្នក។ ដូច្នេះ មិនថារវល់យ៉ាងណា ហោចណាស់ឆ្លៀតពេលសកម្មចំពោះការស្តាប់ និង ឆ្លើយតបទៅកាន់ពួកគេ ដែលបង្ហាញពីការឱ្យតម្លៃនៅក្នុងការទំនាក់ទំនងរវាងគ្នា។
២. និយាយដើម
បើទោះការនិយាយដើមអ្នកដទៃនៅក្រោយខ្នង មិនបង្កជាបញ្ហាថ្វី តែយូរៗទៅវានឹងបង្ហាញថាអ្នកជាមនុស្សមិនគួរឱ្យទុកចិត្ត និង មិនគួរឱ្យគោរព។ ផ្លាស់ប្តូរការនិយាយអវិជ្ជមានពីអ្នកដទៃ ដោយងាកមកផ្តោតការសន្ទនាបែបវិជ្ជមាន ដើម្បីការកសាងទំនាក់ទំនងឱ្យរឹងមាំ និង មានទំនាក់ទំនងដ៏ពិតប្រាកដ។
៣. ចូលចិត្តរិះគន់គេ
បើសម្គាល់ថាខ្លួនចូលចិត្តរិះគន់គេ ចូលចិត្តផ្តល់ដំបូន្មានទាំងដែលគេមិនបានសុំជំនួយ ឬចង្អុលបង្ហាញគេឱ្យធ្វើតាមខ្លួន នោះវានឹងធ្វើឱ្យអ្នកដទៃមានអារម្មណ៍ត្រូវបានមាក់ងាយឬគ្មានតម្លៃ។ ជំនួសមកវិញ អ្នកគួរព្យាយាមគាំទ្រ និង អបអរពួកគេចំពោះការខិតខំប្រឹងប្រែងឬភាពជោគជ័យ ទើបជាការប្រសើរ។
៤. មិនគោរពពាក្យសន្យា
បើមិនច្បាស់ សូមកុំសន្យា ទាំងមិត្តភក្តិ ក្រុមគ្រួសារ និង ស្នេហា។ មិនថាការសន្យាតូចឬធំ បើអ្នកមិនគោរពពាក្យសន្យា វានឹងធ្វើឱ្យពួកគេលែងជឿជាក់មកលើអ្នក។ តែងតែច្បាស់លាស់ទៅលើអ្វីដែលអ្នកបាននិយាយ ហើយធ្វើវាឱ្យចេញជារូបរាង នោះអ្នកនឹងអាចរក្សាភាពជឿជាក់ ក្លាយជាមនុស្សម្នាក់ដ៏គួរឱ្យទុកចិត្ត។
៥. ឱ្យគេខ្វល់តែពីខ្លួនឯង
នៅក្នុងការសន្ទនា កាលណានិយាយផ្តោតប្រធានបទតែលើខ្លួនឯង វាអាចធ្វើឱ្យអ្នកដទៃមានអារម្មណ៍ឆ្ងាយ ជួនធ្វើឱ្យពួកគេធុញទ្រាន់ទៀតផង។ ទន្ទឹមនឹងការនិយាយពីរឿងរបស់អ្នក អ្នកគួរផ្តោតការចាប់អារម្មណ៍ទៅលើសាច់រឿង ឬការនិយាយរបស់អ្នកដទៃ ឬចែករំលែកគំនិតគ្នា ទើបធ្វើឱ្យមិត្តភាពស៊ីជម្រៅ និង យូរអង្វែង។
ជារួមមក ការកែប្រែតែប៉ុន្មានចំណុចទាំងនេះពីឆ្នាំចាស់ នឹងជំរុញទំនាក់ទំនងប្រកបដោយការគោរព គិតវិជ្ជមាន ដែលរក្សាចំណងមិត្តភាពឱ្យកាន់តែរឹងមាំយូរអង្វែងសម្រាប់ឆ្នាំថ្មី៕
