ពិធីបុណ្យចូលឆ្នាំថ្មីប្រពៃណីជាតិខ្មែរ កាន់តែកៀកចូលមកហើយនៅថ្ងៃទី ១៤ ខែមេសាខាងមុននេះ។ យ៉ាងណាមិញ មិនមែនតែកម្ពុជាទេដែលតែប្រារព្ធពិធីបុណ្យនេះ ក្នុងនោះគេឃើញមានប្រទេសជិតខាងកម្ពុជាចំនួន ៣ ទៀត ដូចជា ថៃ ឡាវ មីយ៉ាន់ម៉ា ក៏តែងរៀបចំពិធិបុណ្យនេះផងដែរ។ ខាងក្រោមនេះគឺជាពេលវេលា និង ព្រះនាមទេវតាឆ្នាំថ្មីដែលយាងចុះមកជម្ពូរទ្វីបតាមជំនឿប្រទេសនីមួយៗ។
១. ថ្ងៃចូលឆ្នាំថ្មីប្រទេសកម្ពុជា និង ទេវតា
ប្រទេសកម្ពុជា ពិធីបុណ្យចូលឆ្នាំថ្មី ប្រពៃណីជាតិខ្មែរ ឆ្នាំម្សាញ់ សប្តស័ក ពុទ្ធសករាជ ២៥៦៩ នឹងឈានចូលមកដល់នៅវេលាទៀបភ្លឺ ថ្ងៃច័ន្ទ ២ រោច ខែចេត្រ ត្រូវនឹងថ្ងៃទី ១៤ ខែមេសា គ្រឹស្តសករាជ ២០២៥ វេលាម៉ោង ០៤ និង ៤៨ នាទីទៀបភ្លឺ។ រីឯទេវធីតា ដែលនឹងយាងមកគ្រប់គ្រងជម្ពូរទ្វីបមនុស្សលោក ជាមគ្គនាយិកាព្រះនាម គោរាគៈទេវី ជារាជបុត្រីទី ២ នៃកបិលមហាព្រហ្ម គង់នៅចាតុម្មហារាជិកា ទ្រង់អម្ពរពណ៌លឿង លម្អនៅព្រះកាណ៌ដោយសៀតផ្កាអង្គារបុស្ស អភរណៈ កែវមុក្តា ភក្សាហារទ្រង់តេលំ (ប្រេង) ព្រះហស្តស្តាំទ្រង់ព្រះខ័ន្ធ ព្រះហស្តឆ្វេងទ្រង់ឈើច្រត់ ទ្រង់គង់ផ្ទំបិទព្រះនេត្រលើខ្នងសេ្តចព្យាគ្ឃៈ (ខ្លា) ជាយានពាហនៈ។
២. ថ្ងៃចូលឆ្នាំថ្មីប្រទេសថៃ និង ទេវតា
សម្រាប់ប្រទេសថៃវិញ ថ្ងៃចូលឆ្នាំថ្មីត្រូវនឹងថ្ងៃអាទិត្រ ទី ១៣ ខែមេសា ឆ្នាំ ២០២៥ ជាថ្ងៃមហាសង្ក្រាន្ត ត្រូវនឹងវេលាម៉ោង ៤ និង ២៨ នាទី និង ២៨ វិនាទីព្រឹក ចំណែកទេវតាដែលប្រជាជនថៃហៅថា នាងសង្ក្រាន្ត មានឈ្មោះ ទុង្សាទេវី សៀតផ្កាទទឹមលម្អ សោយផ្លែល្វា ដៃស្តាំកាន់កងចក្រ រីឯដៃឆ្វេងកាន់ខ្យងស័ង្ខ និង បិទភ្នែកផ្ទំលើសត្វគ្រុឌ ជាយានជំនិះ។
៣. ថ្ងៃចូលឆ្នាំថ្មីប្រទេសឡាវ និង ទេវតា
ចំណែកប្រទេសឡាវ ថ្ងៃចូលឆ្នាំថ្មីនឹងប្រព្រឹត្តនៅថ្ងៃច័ន្ទ ទី ១៤ ខែមេសា ឆ្នាំ ២០២៥ ជាថ្ងៃសង្ក្រានល្លួង ត្រូវនឹងវេលាម៉ោង ៤ និង ៤៨ នាទីព្រឹក ប្រហាកប្រហែលនឹងកម្ពុជាដែរ ដោយទេវតាដែលប្រជាជនឡាវហៅថា នាងស័ងខាន នឹងត្រូវយាងចុះមកឆ្នាំថ្មីនេះមានឈ្មោះថា គោរាគៈទេវី ដោយព្រះហស្តស្តាំទ្រង់ព្រះខ័ន្ធ ព្រះហស្តឆ្វេងទ្រង់ឈើច្រត់ ព្រមទាំងមានសត្វខ្លាជាយានជំនិះ៕
