កាលពីថ្ងៃទី ២៨ ខែកញ្ញា ឆ្នាំ ២០២៥ កន្លងទៅ សារព័ត៌មាន Daily Mail បានរាយការណ៍ពីមង្គលការដ៏អកុសលមួយ ដែលកូនកំលោះបានគាំងបេះដូងដួលស្លាប់ភ្លាមៗនៅក្នុងរោង ខណៈកំពុងរាំសប្បាយជាមួយនឹងកូនក្រមុំ។
តាមព័ត៌មានបានឱ្យដឹងថា ហេតុការណ៍មួយនេះបានកើតឡើងនៅឯប្រទេសអេស្ស៊ីប ដោយមង្គលការខាងលើបានប្រព្រឹត្តទៅយ៉ាងរលូន ហើយកូនកំលោះកូនក្រមុំកំពុងកាន់ដៃគ្នារាំអបអរយ៉ាងសប្បាយរីករាយជាមួយនឹងភ្ញៀងទាំងឡាយដែលបានមកចូលរួម។ បានត្រឹមតែមួយខណៈប៉ុណ្ណោះ កូនកំលោះស្រាប់តែដួលខ្ពោកទៅនឹងដី បង្កឱ្យមានការចលាចលពេញរោងការ ហើយភ្ញៀវខ្លះក៏បានរត់មកជួយសង្រ្គោះបឋម តែជាអកុសលកូនកំលោះក៏បានស្លាប់បាត់បង់ជីវិតនៅកន្លែង។
យ៉ាងណាមិញ ក្រោយមកខាងគ្រូពេទ្យបានបញ្ជាក់ឱ្យដឹងថា កូនកំលោះបានបាត់បង់ជីវិតដោយសារតែការគាំងបេះដូង។ ដោយឡែក ម្នាក់ៗមិននឹកស្មានសោះថាមង្គលការដែលពេញទៅសំឡេងអបអរសាទរ ប្រែក្លាយទៅជាសំឡេងយំសោកមួយរំពេច ដោយមច្ចុរាជបានឆក់យកកូនកំលោះទៅទាំងដែលជិតនឹងបានប្រើប្រាស់ជីវិតគូជាមួយនឹងមនុស្សស្រីដែលខ្លួនស្រឡាញ់ទៅហើយ៕
ប្រភព៖ Kapook
