កាលពីថ្ងៃទី ២១ ខែមិថុនា ឆ្នាំ ២០២៥ កន្លងទៅ នៅប្រទេសថៃមានករណីស្រ្តីជាថៅកែផ្លែឈើ វ័យ ៣៩ ម្នាក់ បានសម្រេចចិត្តបញ្ចប់ជីវិតខ្លួនឯង ក្រោយពីការបិទព្រំដែនកម្ពុជា-ថៃ ដោយមិនអាចឱ្យខ្លួននាំផ្លែឈើចេញទៅលក់បាន ថែមជាមួយនឹងការជំពាក់លុយគេជុំទិសទៀត។
តាមព័ត៌មានបានឱ្យដឹងថា ហេតុការណ៍បានកើតឡើងនៅខេត្តចាន់ថាក់បុរី ប្រទេសថៃ ដោយស្រ្តីខាងលើនេះជាមេគ្រួសារខំរកស៊ីលក់ផ្លែឈើតែម្នាក់ឯងជាយូរមកហើយ ព្រមទាំងមានបំណុលជាប់ខ្លួន និង ថែមទាំងយកប្លង់ផ្ទះទៅបញ្ចាំទៀតផង។ នៅថ្ងៃកើតហេតុ ស្រ្តីរូបនេះបានត្រឡប់មកផ្ទះវិញ ហើយក៏បានចូលទៅបន្ទប់ទឹក រួចក៏យកកាំភ្លើងបាញ់ចំដើមទ្រូងខ្លួនឯង បណ្តាលឱ្យស្លាប់នៅនឹងកន្លែង។
យ៉ាងណាមិញ តាមរយៈស្វាមីរបស់ជនរងគ្រោះបានឱ្យដឹងថា ប្រពន្ធរបស់ខ្លួនមានការពិបាកចិត្តយូរមកហើយទាក់ទងនឹងបំណុល និង ការរកស៊ី ដោយនាងធ្លាប់និយាយថាលែងចង់មានជីវិតរស់ ហើយក្រោយមកក៏ជួបបញ្ហារឿងព្រំដែនកម្ពុជា-ថៃថែមទៀត ដែលបណ្តាលឱ្យនាំផ្លែឈើចេញមិនបាន ទើបនាំឱ្យគិតខ្លី និង សម្រេចចិត្តបញ្ចប់ជីវិតខ្លួនឯង៕
ប្រភព៖ Thairath
