កាលពីថ្ងៃទី ០៤ ខែកក្កដា ឆ្នាំ ២០២៥ កន្លងទៅ រដ្ឋមន្ត្រីក្រសួងវប្បធម៌ លោកស្រី Paetongtarn Shinawatra បានធ្វើការបញ្ជាឱ្យបញ្ឈប់ការប្រគល់វត្ថុបុរាណខ្មែរចំនួន ២០ ដែលនាំចូលទៅប្រទេសថៃខុសច្បាប់ មកឱ្យប្រទេសកម្ពុជាវិញ ដោយលើកហេតុផលឡើងថាថវិកាមានកំណត់។ ជាមួយគ្នានេះដែរ លោកស្រី Paetongtarn ដែលជានៅជានាយករដ្ឋមន្ត្រីព្យួរតំណែងនោះ ក៏បានគំរាមចាត់វិធានការតាមផ្លូវច្បាប់ទៅលើអ្នកដែលចោទប្រកាន់លោកស្រីថាបានគប់គិតជាមួយកម្ពុជាលើការប្រគល់វត្ថុបុរាណទាំងនោះមកឱ្យកម្ពុជាវិញ។
ជាមួយគ្នានោះដែរ ក្នុងថ្ងៃដដែលនោះ អ្នកនាំពាក្យរដ្ឋាភិបាល លោក Jirayu Huangsap បានចេញមកអះអាងថាព័ត៌មានដែលចុះផ្សាយថាក្រសួងវប្បធម៌ប្រគល់វត្ថុបុរាណចំនួន ២០ ឱ្យកម្ពុជាវិញ គឺជាព័ត៌មានក្លែងក្លាយ និង សង្កត់បញ្ជាក់ថាជាព័ត៌មានចាស់តាំងពី ២៥ ឆ្នាំមុន។
លោកបានរៀបរាប់ថា កាលនោះខាងនាយកដ្ឋានគយបានរឹបអូសវត្ថុបុរាណចំនួន ៤៣ ដែលស្រដៀងនឹងវត្ថុបុរាណកម្ពុជា នាំចូលខុសច្បាប់ពីសិង្ហបុរីមកប្រទេសថៃ។ ក្រោយមក នាយកដ្ឋានវិចិត្រសិល្បៈក៏បានចុះត្រួតពិនិត្យ ដោយក្នុងពេលនោះ វត្ថុបុរាណចំនួន ២៣ ត្រូវបានប្រគល់ត្រឡប់ឱ្យវិញ។ ក្រោយមកទៀត រដ្ឋាភិបាលប្រទេសកម្ពុជាបានដាក់សំណើរស្នើសុំវត្ថុបុរាណទាំង ២០ ដែលនៅសល់នោះមកវិញ អមជាមួយឯកសារ និងភស្តុតាងបញ្ជាក់ពីការទាមទារកម្មសិទ្ធិ។ អ្នកនាំពាក្យរដ្ឋាភិបាលដដែលបានបន្តទៀតថា តាមការត្រួតពិនិត្យពីខាខាងនាយកដ្ឋានវិចិត្រសិល្បៈ តាមរយៈគណៈកម្មការជាច្រើន បានសន្និដ្ឋានថា វត្ថុបុរាណទាំង ២០ នោះគឺពិតជាមានប្រភពមកពីកម្ពុជាមែន។
ដោយឡែក នៅថ្ងៃទី ០៦ ខែកក្កដា ឆ្នាំ ២០២៥ កន្លងទៅនេះ មានលិខិតបែកធ្លាយ ដែលបង្ហោះនៅលើ Facebook ឈ្មោះ The Troll ASEAN ដែលលិខិតនោះមានខ្លឹមសារថា រដ្ឋមន្ដ្រីក្រសួងវប្បធម៌កម្ពុជា បានអះអាងថា នៅក្នុងដំណើរទស្សនកិច្ចផ្លូវការរបស់លោកស្រី ផែថងថាន ក្នុងនាមជានាយករដ្ឋមន្ត្រីនៃព្រះរាជាណាចក្រថៃ កាលពីថ្ងៃទី ២៣ ខែមេសា ឆ្នាំ២០២៥ នៅរាជធានីភ្នំពេញ រាជរដ្ឋាភិបាលនៃប្រទេសទាំងពីរ (កម្ពុជា-ថៃ) បានប្រកាសរួមគ្នាឯកភាពលើការប្រគល់វត្ថុបុរាណខ្មែរទាំង ២០ដុំ ដែលជាមរតកដ៏ថ្លៃថ្លារបស់ប្រជាជនខ្មែរ មកកម្ពុជាវិញ។
ក្នុងលិខិតនោះ បានបញ្ជាក់ថា រដ្ឋាភិបាលថៃ មានចេតនាមិនចង់ឱ្យវត្ថុបុរាណរបស់ខ្មែរវិលត្រឡប់មកប្រទេសដើមវិញ និង ប្រើលេសអូសបន្លាយពេលវេលាថាខ្វះខាតថវិកាក្នុងការដឹកជញ្ជូនមកកម្ពុជា ទើបលោកស្រីបណ្ឌិតសភាចារ្យ ភឿង សកុណា រដ្ឋមន្ដ្រីក្រសួងវប្បធម៌ និងវិចិត្រសិល្បៈ បានផ្ញើលិខិតផ្លូវការរំឭកទៅលោកស្រី ផែថងថាន ស៊ីណាវ៉ាត្រ រដ្ឋមន្ដ្រីក្រសួងវប្បធម៌ថៃ ឱ្យគោរពកិច្ចសន្យាប្រគល់វត្ថុបុរាណខ្មែរ ចំនួន ២០ដុំ ត្រឡប់មកប្រទេសកម្ពុជាវិញ ខណៈការចំណាយក្នុងការដឹកជញ្ជូន គឺកម្ពុជាជាអ្នករាប់រងនោះទេ៕
សូមអានលិខិតលម្អិតខាក្រោម៖
