ថៃ ប្រកាសអាសន្នឱ្យអ្នកនៅទីក្រុងបាងកក និង ខេត្តភាគកណ្តាលចំនួន ១០ ប្រយ័ត្នខ្លួនរឿងទឹកជំនន់ ព្រោះទន្លេចៅផ្រះយ៉ា កាន់តែឡើងខ្លាំងទៅៗ

នៅថ្ងៃទី ៥ ខែកញ្ញា ឆ្នាំ ២០២៥ នេះ នាយកដ្ឋានបង្ការ និងកាត់បន្ថយគ្រោះមហន្តរាយរបស់ថៃ បានប្រកាសឱ្យប្រជាជននៅក្នុងទីក្រុងបាងកក និងខេត្តភាគកណ្តាលចំនួន ១០ មានការប្រុងប្រយ័ត្នចំពោះទឹកជំនន់ ព្រោះទន្លេចៅផ្រះយ៉ាកាន់តែឡើងខ្លាំង។

តាមព័ត៌មានបានឱ្យដឹងថា តាមរយៈការប៉ាន់ស្មាន ទឹកដែលហូរកាត់ស្ថានីយ៍ C.2 ក្នុងខេត្តណាក់ខនសុវណ្ណនឹងមានបរិមាណប្រមាណពី ១,៩០០-២,៣០០ ម៉ែត្រគូប ក្នុងមួយវិនាទី កម្ពស់ទឹកក្នុងទន្លេចៅផ្រះយ៉ា នឹងកាន់កើនឡើងប្រមាណ ០.៣០-១.១០ម៉ែត្រ ពីកម្រិតបច្ចុប្បន្ននេះ។

ដូចនេះហើយ នាយកដ្ឋានបង្ការ និងកាត់បន្ថយគ្រោះមហន្តរាយបានសហការជាមួយនឹងអាជ្ញាធរនាទីក្រុងបាងកក និងខេត្តនៅភាគកណ្តាលចំនួន ១០ ដែលមានដូចជាខេត្តអ៊ុតទៃថានី ឆៃណាត ស៊ិងបុរី អាងថង សុផាន់បុរី អយុធ្យា លុបបុរី ប៉ាក់ធុមថានី នុនថាក់បុរី និង សមុទ្រប្រាកាន ឱ្យនាំគ្នារៀបចំត្រៀមខ្លួនសម្រាប់ការដោះស្រាយជាមួយនឹងទឹកជំនន់ ជាពិសេសគឺជូនដំណឹងដល់ប្រជាជនឱ្យប្រញាប់រើអីវ៉ាន់ទៅកាន់ទីខ្ពស់៕

ប្រភព៖ Khaosod