ថ្មីៗនេះ អ្នកនាំពាក្យប្រចាំទីបញ្ជាការតំបន់ទី ៤ របស់ថៃ បានទម្លាយទាក់ទងករណីដែលមានជនល្មើសលួចដាក់គ្រាប់បែកនៅក្នុងតំបន់មួយចំនួននៃខេត្ត Phang Nga Krabi និង Phuket។
អ្នកនាំពាក្យបានឱ្យដឹងថា ចាប់ពីខែធ្នូ ឆ្នាំ ២០២៤ ដល់ខែមេសា ឆ្នាំ២០២៥ មានការលួចដាក់គ្រាប់បែកចំនួន ១១ កន្លែង នៅក្នុងខេត្តចំនួន ៣ ដែលមានដូចជា Phang Nga Krabi និង Phuket។ ក្នុងនោះ ខេត្ត Krabi ចំនួន៤ កន្លែង មានគ្រាប់បែកចំនួន ៥ គ្រាប់ ខេត្ត Phang Nga ចំនួន ១ កន្លែង មានគ្រាប់បែកចំនួន ១ គ្រាប់ ខេត្តភូកេតចំនួន ៦ កន្លែង មានគ្រាប់បែកចំនួន ៦ គ្រាប់ និងចាប់បាន ១ គ្រាប់ជាមួយនឹងជនសង្ស័យ សរុប ១៥ គ្រាប់។ ដោយឡែក ទីតាំងនៃការដាក់គ្រាប់បែក ភាគច្រើនផ្តោតលើទេសចរណ៍ ព្រលានយន្តហោះ និងនៅមុខផ្ទះរបស់អភិបាលខេត្ត ហើយគ្រាប់បែកភាគច្រើនមានទំហំតូច មិនមានកម្លាំងខ្លាំង មិនអាចបណ្តាលឱ្យប៉ះពាល់ដល់ជីវិត តែចេតនារបស់ជនល្មើស គឺគ្រាន់តែបង្កើតរូបភាពអសន្តិសុខ និង បង្កភាពចលាចល។
យ៉ាងណាមិញ ខាងអាជ្ញាធរឃាត់ខ្លួនជនសង្ស័យបានចំនួន ៥ នាក់ ជាជនស្ថិតក្នុងក្រុមចលនា BRN ដែលជាក្រុមបះបោរផ្តាច់ខ្លួនស្វែងរកឯករាជ្យសម្រាប់ប្រជាជនម៉ាឡេ-ម៉ូស្លីមនៅភាគខាងត្បូងប្រទេសថៃ។ ក្រុមនេះបានបង្កអសន្តិសុខផ្សេងៗនៅក្នុងប្រទេសថៃដូចខាងលើ ដើម្បីដាក់សម្ពាធលើរដ្ឋាភិបាលឱ្យមានការចរចាជាមួយពួកគេ ក្នុងការផ្តល់តម្រូវការដែលពួកគេចង់បាន៕
ប្រភព៖ Thairath
