ថៃមិនដឹងក្បាលកន្ទុយ បង្ហោះមិនខ្មាសថាឈុតតំណាងជាតិខ្មែរ ដែល ហ្វីយ៉ាតា ត្រៀមបង្ហាញថ្ងៃស្អែក គឺប្រឡាយកាត់ពីឈុតថៃ

ស្របពេលកម្មវិធីអន្តរជាតិ Miss Universe 2025 ឈានដល់វគ្គប្រកួតបឋម ដែលមានវិញ្ញាសារបង្ហាញឈុតតំណាងជាតិ នៅថ្ងៃទី ១៩ ខែវិច្ឆិកា ឆ្នាំ ២០២៥ នេះ ក្រឡេកមើលមហាជនអ្នកតាមដានវិស័យបវរកញ្ញាកម្ពុជា ក៏កំពុងចាប់អារម្មណ៍ចែករំលែកសរសើរពេញចិត្តពីឈុតតំណាងជាតិដ៏ប្រណីតរបស់កម្ពុជា ដែលបវរកញ្ញា ហ្វីយ៉ាតា យកទៅប្រកួតលើឆាកអន្តរជាតិនេះ គឺមានឈ្មោះថា ចាប៉ីដងវែង (Golden Japei) ដែលត្រៀមបង្ហាញនៅវគ្គប្រកួតបឋមថ្ងៃទី ១៩ ខែវិច្ឆិកា ឆ្នាំ ២០២៥។

ឈុតតំណាងជាតិរបស់កម្ពុជា «ចាប៉ីដងវែង (Golden Japei )» នេះដែរ ធ្វើឡើងដោយគំនិតច្នៃប្រឌិតផ្ទាល់ពីបវរកញ្ញា ហ្វីយ៉ាតា និង អ្នកច្នៃម៉ូត ដែលជាឈុតជាប់ Best National Costume កាលពីប្រកួតកម្មវិធីក្នុងស្រុក Miss Universe Cambodia 2025 ដោយមានការរចនាឡើងយ៉ាងប្រណីតស្រស់ស្អាត រំលេចដោយក្បូរក្បាច់វប្បធម៌ខ្មែរ អមជាមួយនឹងចាប៉ីដងវែង ដែលជាសម្បត្តិបេតិកភណ្ឌវប្បធម៌អរូបីមនុស្សជាតិពិភពលោក។

ស្របពេលបណ្ដាញសង្គមកម្ពុជាកំពុងចែករំលែកពីឈុតតំណាងជាតិដ៏ប្រណីតនេះដែរ ក៏បានឃើញខាងបណ្ដាហ្វេស​ប៊ុក​ផេក​របស់ថៃជាច្រើន បានចែករំលែកពីឈុតតំណាងជាតិកម្ពុជាទៅប្រៀបធៀបនឹងឈុតរបស់ថៃ ដែលបានលើកឡើង​ថាឈុត និង គ្រឿងប្រដាប់របស់កម្ពុជា គឺរចនាយកលំនាំពីឈុតថៃទៀតផង។ ក្នុងនោះ ហ្វេសប៊ុកថៃទាំងនោះ បានលើកនិយាយពីការច្នៃរចនាម៉ូតឈុត ក៏ដូចជាគ្រឿងអលង្ការរបស់ខ្មែរ ថាយកម៉ូតតាមឈុតរបស់ថៃឈ្មោះ Chitlada និង បវរកញ្ញា Amanda ព្រមទាំងឧបករណ៍ភ្លេងចាប៉ីដងវែង ក៏ធ្វើឡើងតាមលំនាំថៃដូចបវរកញ្ញា Antonia កាន់កាលពីឆ្នាំ ២០២៣។

យ៉ាងណាមិញ ក្រឡេកមកមើលជុំវិញអត្ថន័យ ក៏ដូចជាប្រភពនៃការច្នៃម៉ូតឈុតតំណាងជាតិកម្ពុជាដ៏ប្រណីតល្អឯកនេះ គឺមានអន្ថន័យថា ៖ «Golden Japei / ចាប៉ីដងវែង: ចាប៉ីដងវែង ត្រូវបានដាក់បញ្ចូលជាសម្បត្តិបេតិកភណ្ឌវប្បធម៌អរូបីមនុស្សជាតិពិភពលោក ដោយអង្គការ UNESCO នាថ្ងៃទី៣០ ខែវិច្ឆិកា ២០១៦ នៅទីក្រុង Addis Ababa ប្រទេសអេត្យូពី។ ចាប៉ី ដែលមានសំឡេងពីរោះ គឺធ្វើតាមពាក្យពោលថា “ស្នូក រាំង ដង ក្រសាំង សន្ទះ ខ្ទុម្ព គីង្គក់ ធ្នង់ ខ្ទង់ ឆ្អឹង”។ តាមគំនិត ចាស់បុរាណបានឱ្យនិមិត្ដរូបលើឧបករណ៍នេះថា “ស្នូកតំណាងក្បាលនាគ, ដងតំណាងខ្លួននាគ, ប្រពែតំណាងកន្ទុយនាគ” ដែលបង្ហាញពីតម្លៃនៃវប្បធម៌ដ៏ចំណាស់របស់ខ្មែរ ព្រមទាំងជាតួអង្គមួយដ៏លេចធ្លោនៅលើវេទិកាបេតិកភណ្ឌពិភពលោក។ ដំឡើងឈុតដោយ ស្ករគ្រាប់»៕