កាលពីថ្ងៃទី ២០ ខែកក្កដា ឆ្នាំ ២០២៥ កន្លងទៅ ក្រសួងការបរទេសថៃ បានចេញសេចក្តីថ្កោលទោសជាផ្លូវការមកលើប្រទេសកម្ពុជា ទាក់ទងនឹងករណីទាហានថៃចំនួន ៣ នាក់ បានជាន់មីននៅតំបន់មុំបី ដោយចោទថាកម្ពុជាលួចដាក់គ្រាប់មីនថ្មីខុសនឹងច្បាប់អន្តរជាតិ ហើយឱ្យកម្ពុជាបោសសម្អាតមីនតាមជាយដែនឱ្យអស់។
ក្រសួងការបរទេសថៃបានឱ្យដឹងថា ក្រោយពីការកើតហេតុនៅថ្ងៃទី ១៦ ខែកក្កដា ឆ្នាំ ២០២៥ កន្លងទៅ ដែលទាហាន ៣ នាក់បានជាន់មីននៅតំបន់មុំបី ខាងរដ្ឋាភិបាលបានទទួលរបាយការណ៍ពីភ្នាក់ងារសន្តិសុខថៃថា គ្រាប់មីនដែលផ្ទុះនោះមិនត្រូវបានប្រើប្រាស់ ឬ នៅក្នុងឃ្លាំងអាវុធរបស់ថៃឡើយ ហើយគឺជាគ្រាប់ដែលទើបតែដាក់ថ្មី។ នេះគឺជាការបំពានច្បាប់អន្តរជាតិយ៉ាងធ្ងន់ធ្ងរ។
រដ្ឋាភិបាលថៃ បានថ្កោលទោសយ៉ាងខ្លាំងចំពោះការប្រើប្រាស់មីនប្រឆាំងមនុស្សនេះ ដោយចោទជាការរំលោភលើអធិបតេយ្យភាព និង បូរណភាពទឹកដីរបស់ប្រទេសថៃ ព្រមទាំងជាទង្វើដែលបំពានលើគោលការណ៍ជាមូលដ្ឋាននៃច្បាប់អន្តរជាតិដែលមានចែងក្នុងច្បាប់អង្គការសហប្រជាជាតិ។ រដ្ឋាភិបាលថៃចោទទៀតថា វាជាការបំពាននូវកាតព្វកិច្ចក្រោមអនុសញ្ញាហាមប្រាមមីនប្រឆាំងមនុស្ស ហើយភាគីថៃអះអាងថានឹងព្យាយាមដោះស្រាយជាមួយនឹងកម្ពុជាតាមរយៈយន្តការទ្វេភាគីដែលមានស្រាប់ ព្រមទាំងអំពាវនាវឱ្យកម្ពុជាសហការក្នុងការបោសសម្អាតមីននៅតាមព្រំដែន ក្រោមការព្រមព្រៀងដោយនាយករដ្ឋមន្ត្រីទាំងពីរក្នុងក្របខណ្ឌទ្វេភាគី៕
ប្រភព៖ Khaosod
