នៅថ្ងៃទី ២ ខែកក្កដា ឆ្នាំ ២០២៥ នេះ នៅទីបញ្ជាការកងយោធពលខេមរភូមិន្ទថៃ ឧត្តមសេនីយ៍ទោ Winthai Suvari អ្នកនាំពាក្យកងយោធពលខេមរភូមិន្ទ ស្រាប់តែបានចេញមុខមកបំភ្លឺអំពីករណីក្ដៅគគុកមួយ ក្រោយមហាជនថៃមួយចំនួនជ្រួលច្របល់ផុសតាមបណ្តាញសង្គមបន្ទាប់ពីឃើញក្នុងកម្មវិធី Google Map បានដៅទីតាំងប្រាសាទតាមាន់ធំចេញពីទឹកដីថៃ មកនៅទឹកដីកម្ពុជា។
លោក Winthai Suvari ដែលជាអ្នកនាំពាក្យកងយោធពលខេមរភូមិន្ទថៃ បានពន្យល់ពីករណីនេះក្នុងន័យកុំឱ្យប្រជាជនថៃព្រួយបារម្ភថា Google Map ដែលផ្លាស់ទីបង្គោលប្រាសាទតាមាន់ធំពីថៃមកកម្ពុជា គឺពុំមានច្បាស់លាស់ផ្លូវច្បាប់ក្នុងតុលាការយុត្តិធម៌អន្តរជាតិទេ។ លោកបញ្ជាក់ទៀតថា ប្រទេសថៃបានអនុវត្តអធិបតេយ្យភាពលើតំបន់ប្រាសាទតាមាន់ធំយូរមកហើយ ដោយប្រកាន់ខ្ជាប់នូវភស្តុតាងភូមិសាស្ត្រ និង ការគ្រប់គ្រងរបស់ភ្នាក់ងាររដ្ឋាភិបាល។
លោក Winthai Suvari បានបញ្ជាក់លម្អិតថា បន្ទាត់ព្រំដែនដែលបង្ហាញក្នុង Google Map ជារឿងដែលមនុស្សទូទៅអាចកែប្រែបាន និង ប្រើសម្រាប់សម្រួលក្នុងការធ្វើដំណើរប៉ុណ្ណោះ វាមិនមែនជាព័ត៌មានផ្លូវការ មិនមានឥទ្ធិពលតាមផ្លូវច្បាប់ និង មិនអាចយកជាភស្តុតាងទៅតុលាការអន្តរជាតិបាននោះទេ។ លោកថា ថៃបានអនុវត្តអធិបតេយ្យភាពលើតំបន់ប្រាសាទតាមាន់ធំ ដោយផ្អែកលើភស្តុតាងភូមិសាស្ត្រពិតប្រាកដ ហើយបើទោះជាប្រជាជនខ្មែរបានទៅដល់ប្រាសាទនោះក៏ដោយ វាស្ថិតនៅក្រោមការព្រមព្រៀងគ្នាទៅវិញទៅមក។
ជារួមព័ត៌មាននៅក្នុង Google Maps អាចមានភាពមិនត្រឹមត្រូវ និង មិនអាចត្រូវបានប្រើប្រាស់ជាភស្តុតាងនៅតុលាការយុត្តិធម៌អន្តរជាតិឡើយ ហើយប្រទេសថៃនៅតែកាន់កាប់ ព្រមទាំងគ្រប់គ្រងតំបន់ប្រាសាទតាមាន់ធំដូចធម្មតា ដោយគ្មានការផ្លាស់ប្តូរស្ថានភាពលើទឹកដីជាក់ស្តែងនោះទេ។
ការបកស្រាយនេះ គឺធ្វើឡើងបន្ទាប់ប្រជាជនថៃមួយចំនួនបានឃើញនៅក្នុងកម្មវិធី Google Map ពីការដៅទីតាំងតំបន់ប្រាសាទតាមាន់ធំចេញពីទឹកដីថៃមកទឹកដីកម្ពុជា ដោយពួកគេមានការព្រួយបារម្ភថាការនេះកម្ពុជាអាចយកបង្កើតជាភស្តុតាង និង ធ្វើជាឯកសារយោងប្ដឹងទៅតុលាការយុត្តិធម៌អន្តរជាតិ។ លោកសង្កត់ធ្ងន់ចំពោះប្រជាពលរដ្ឋថៃថា កុំយល់ច្រលំថាប្រាសាទតាមាន់ធំស្ថិតនៅក្នុងទឹកដីកម្ពុជា ហើយថាថៃចង់ឈ្លានពានទឹកដីកម្ពុជា និង ដណ្តើមយកប្រាសាទតាមាន់ធំឱ្យសោះ៕
ប្រភព៖ Naewna
