ស្របពេលកងទ័ពខ្មែរកំពុងឈរជើងនៅឯព្រំដែនខេត្តព្រះវិហារក្នុងកិច្ចការពារបូរណភាពទឹកដី ក្រោយមានការប៉ះទង្គិចរវាងកងទ័ពកម្ពុជា និង ថៃ ពេលនេះដែរ លើបណ្ដាញសង្គមមហាជនអ្នកប្រើប្រាស់ហ្វេសប៊ុក កំពុងបង្ហោះចែករំលែកបង្ហាញការជូនពរ និង កម្លាំងចិត្តដល់បងប្អូនកងទ័ពខ្មែរដែលកំពុងលះបង់កម្លាំងកាយចិត្តដើម្បីមាតុភូមិ។
ជាមួយគ្នានោះ ក្រៅពីចែករំលែកបង្ហាញការបួងសួងជូនពរ ក៏ឃើញមានបងប្អូនមហាជន អ្នកជំនួញ ក៏ដូចជាអ្នកសិល្បៈបានចូលរួមជាថវិកាផ្ទាល់ខ្លួនជាជំនួយសម្រួលលើស្បៀងអាហារជូនបងប្អូនកងទ័ពខ្មែរជាបន្តបន្ទាប់។
ក្នុងនោះ ក៏បានឃើញអ្នកជំនួញអនឡាញល្បីឈ្មោះអ្នកនាង ឡុង ម៉ានីន គូស្នេហ៍របស់តារាចម្រៀង ថុល សុភិទិ បានចូលរួមជាថវិកាចំនួន ១ ម៉ឺនដុល្លារ ដើម្បីជួយដល់គ្រួសារបងប្អូនកងទ័ពខ្មែរដែលខ្វះខាតផងដែរ។
ក្រោយឃើញទឹកចិត្តដ៏ប្រពៃរបស់អ្នកនាង ឡុង ម៉ានីន នេះដែរ ក៏បានឃើញតារាចម្រៀង ថុល សុភិទិ ចែករំលែកបង្ហាញការស្ងើចសរសើរពីទឹកចិត្តដ៏ល្អស្អាតទាំងកាយ ទាំងចិត្តរបស់គូស្នេហ៍ ដែលតែងជួយដល់បងប្អូនខ្មែរដែលខ្វះខាត និង រួមចំណែកជួយដល់ជាតិមាតុភូមិផងដែរ៕
