មានបញ្ហាជ្រុះសក់ មុនពេលសម្រេចចិត្តធ្វើការព្យាបាលដោយប្រើផលិតផលណាមួយ អ្នកគួរមើលឡើងវិញថាតើរៀងរាល់ថ្ងៃ អ្នកទទួលបានវីតាមីនផ្គត់ផ្គង់គ្រប់គ្រាន់ហើយឬនៅ។ ការទទួលយកវីតាមីនតាមកម្រិតត្រឹមត្រូវ វាជួយបញ្ហាជ្រុះសក់បានយ៉ាងមានប្រសិទ្ធភាព និង ជួយបណ្តុះសក់មកវិញឱ្យមានសុខភាពល្អ។ តស់! មកដឹងពីវីតាមីនជំនួយសក់សំខាន់ៗ គឺមាន ៧ យ៉ាងដូចខាងក្រោម៖
១. វីតាមីន C
វីតាមីន C ផ្ទុកទៅដោយសារធាតុប្រឆាំងអុកស៊ីតកម្មយ៉ាងច្រើន ដូចទៅនឹង វីតាមីន E និង ស័ង្កសីផងដែរ។ សារធាតុប្រឆាំងអុកស៊ីតកម្មនេះ ជួយកាត់បន្ថយចំពោះការបំផ្លាញដោយរ៉ាឌីកាល់សេរី ដែលវាជះផលអាក្រក់ចំពោះសក់។ សម្រាប់បុរសតម្រូវទទួលយកវីតាមីន C ៩០ មីលីក្រាមជាប្រចាំ ចំណែកស្ត្រីត្រឹមតែ ៧៥ មីលីក្រាម។ ចំពោះស្ត្រីមានផ្ទៃពោះ និង កំពុងបំបៅដោះ អាចទទួលយកត្រឹម ៣៥ មីលីក្រាមជាប្រចាំ។ អាហារវីតាមីន C មានដូចជា ពពួកផ្លែក្រូច ម្ទេសប្លោកលឿង ល្ហុង និង ស្ត្រូបូរី។
២. វីតាមីន E
វីតាមីន E ផ្ទុកបរិមាណសារធាតុប្រឆាំងអុកស៊ីតកម្មច្រើនបំផុត វាមានសមត្ថភាពខ្ពស់ក្នុងការប្រយុទ្ធប្រឆាំងនឹងការបំផ្លាញដោយ រ៉ាឌីកាល់សេរីទៅលើស្បែក និង ស្បែកក្បាល។ សារធាតុប្រឆាំងអុកស៊ីតកម្មនឹងជំរុញឱ្យវីតាមីន E ពង្រឹងមុខងារក្នុងរាងកាយ ដើម្បីការពារសរីរាង្គ និងជាលិកានៃសក់ពីការបំផ្លាញដោយរ៉ាឌីកាល់សេរី។ វីតាមីន E មាននៅក្នុងពពួកស្ពៃបៃតង ប្រេងផ្កាឈូករ័ត្ន គ្រាប់ផ្លែឈើ ល្ពៅ និង ដំឡូងជ្វា។ បើអ្នកចង់ប្រើវីតាមីន E ជាគ្រាប់លេប ត្រូវប្រាកដថា លេបត្រឹមតែបរិមាណ 400 IU ប៉ុណ្ណោះក្នុងមួយថ្ងៃ ហើយមិនត្រូវលើសពី 1000 IU។
៣. វីតាមីន A
វីតាមីន A ជួយជំរុញដល់ការលូតលាស់សក់ និង ល្អបំផុតសម្រាប់សុខភាពស្បែក។ អ្នកអាចទទួលយកវីតាមីន A តាមរយៈថ្នាំគ្រាប់ អាហារ ឬប្រើសេរ៉ូមវីតាមីន A មកត្រដុសលើស្បែកក្បាល និង សក់ផ្ទាល់។ វីតាមីន A មាននៅក្នុង ការ៉ុត ដំឡូងជ្វា ពពួកស្ពៃខៀវ ល្ពៅ និង ត្រសក់ស្រូវ។
៤. អាស៊ីតខ្លាញ់អូមេហ្គាបី
អាស៊ីតខ្លាញ់អូមេហ្គាបី មានអត្ថប្រយោជន៍ល្អបំផុតចំពោះសុខភាពសក់ និង ស្បែកក្បាល។ វាអាចការពារតម្ពែក ដែលបង្កមកពីបញ្ហាខាងក្រៅ និង កាត់បន្ថយតម្ពែកបណ្តាលមកពីហ្សែនតំណពូជ។ ការទទួលយកអាស៊ីតខ្លាញ់អូមេហ្គាបីតាមរយៈអាហារ អាចទទួលបានអត្ថប្រយោជន៍ច្រើនជាង បើធៀបទៅនឹងការប្រើថ្នាំគ្រាប់។ តែបើចង់ប្រើប្រភេទគ្រាប់ អ្នកអាចប្រើពពួកប្រេងត្រី ១ ស្លាបព្រាកាហ្វេ ឬគ្រាប់វីតាមីនប្រេងត្រី ១ ទៅ ២ គ្រាប់ ក្នុងមួយថ្ងៃជាប្រចាំ វាក៏ជួយការពារសក់ជ្រុះ និង ជំរុញឱ្យសក់ដុះឡើងវិញ។
៥. ជាតិដែក
កង្វះជាតិដែកសក់នឹងកាន់តែជ្រុះច្រើន ហើយសរសៃសក់ចាប់ផ្តើមផុយងាយដាច់ផងដែរ។ នេះក៏ដោយសារតែមិនមានអុកស៊ីហ្សែនគ្រប់គ្រាន់ផ្តល់ទៅកាន់សក់ និង ស្បែកក្បាល។ ស្រ្តីទូទៅតែងតែជួបបញ្ហាខ្វះជាតិដែក ដោយសារបាត់បង់ឈាមនៅពេលមករដូវ ជាពិសេសនៅពេលមានផ្ទៃពោះ និង ពេលកំពុងបំបៅទឹកដោះ។ លើសពីនេះ ការកង្វះជាតិដែកអាចប្រឈមជំងឺខ្វះឈាម។ អ្នកអាចទទួលយកជាតិដែកតាមរយៈអាហារដូចជា សណ្តែកក្រហម, អ៊យស្ទ័រ, ថ្លើមសត្វ, ពពួកស្ពៃខៀវ និង គ្រាប់ល្ង។ មនុស្សប្រុសវ័យចាប់ពី ១៩ ឆ្នាំឡើងទៅអាចទទួលយកជាតិដែក ៨ មីលីក្រាមក្នុងមួយថ្ងៃ រីឯមនុស្សស្រីអាយុ ១៩ ដល់ ៥០ ឆ្នាំ អាចទទួលយក ១៨ មីលីក្រាមក្នុងមួយថ្ងៃ និង ចាប់ពី ៥០ ឆ្នាំឡើងទៅទទួលយក ៨ មីលីក្រាមក្នុងមួយថ្ងៃ។ បើស្ត្រីមានផ្ទៃពោះវិញ អាចទទួលយក ២៧ មីលីក្រាមក្នុងមួយថ្ងៃ និង ស្ត្រីកំពុងបំបៅដោះ ១០ មីលីក្រាមក្នុងមួយថ្ងៃ។
៦. ជាតិ Biotin
ការទទួលយកជាតិ Biotin គ្រប់គ្រាន់តាមរយៈរបបអាហារ និង ប្រភេទគ្រាប់លេប អាចជួយឱ្យសក់រឹងមាំ និង ការពារពីភាពផុយស្រួយ។ អាហារសម្បូរជាតិ Biotin មានដូចជា សណ្តែកដី, ថ្លើមសត្វ, បន្លែបៃតង, ស៊ុតស្ងោរ និង ស៊ុតឆៅ។
៧. ស័ង្កសី
ប្រសិនបើស្បែកខ្លួន និង ស្បែកក្បាលស្ងួតលាយឡំអង្គែ នេះគឺជាបញ្ហាបណ្តាលមកពីកង្វះជាតិស័ង្កសី។ កង្វះវីតាមីន A និង D ក៏ជាដើមចមនៃការចុះថយស័ង្កសីផងដែរ។ ម្យ៉ាងទៀត ការកង្វះស័ង្កសី និង ទទួលយកស័ង្កសីច្រើនលើសលុប ក៏បណ្តាលឱ្យកើតបញ្ហាជ្រុះសក់ផងដែរ។ ដូចនេះ គួររក្សាតុល្យភាពស័ង្កសី ដោយទទួលទានអាហារដូចជា អ៊យស្ទ័រ, ពពួកសណ្តែក, គ្រាប់ល្ពៅ, ស៊ុតស្រស់, ថ្លើមសត្វ, ស្រូវសាលី, សណ្តែកសៀង, និង គ្រាប់ផ្លែឈើ៕
