នាពេលថ្មីៗនេះ ទីភ្នាក់ងារជាតិមុខរបរ និង ការងារ បានជូនដំណឹងពីឱកាសការងារ សរុបជាង ៥ ពាន់កន្លែង ដោយជួបផ្ទាល់ជាមួយក្រុមហ៊ុនធំៗចំនួន ២០ នៅក្នុង «ពិព័រណ៍ការងារ និង មគ្គទេសក៍អាជីព» ឆ្នាំ ២០២៥ ដែលនឹងធ្វើឡើងក្នុងរយៈពេល ៣ ថ្ងៃទៀត គឺនៅថ្ងៃទី ៩ និង ថ្ងៃទី ១០ ខែឧសភា ឆ្នាំ ២០២៥។
តាមរយៈសេចក្ដីជូនដំណឹង បានឱ្យដឹងថា ទីភ្នាក់ងារជាតិមុខរបរ និង ការងារ នៃក្រសួងការងារ និង បណ្តុះបណ្តាលវិជ្ជាជីវៈ បានសហការជាមួយសហភាពសហព័ន្ធយុវជនកម្ពុជារាជធានីភ្នំពេញ និង សភាពាណិជ្ជកម្មកម្ពុជា-អ៊ីស្រាអែល នឹងរៀបចំពិព័រណ៍ការងារ និង មគ្គទេសក៍អាជីព រយៈពេល ២ ថ្ងៃជាប់គ្នា នៅអគារអង្គរវត្ត ស្ថិតនៅក្នុងវិទ្យាស្ថានជាតិបណ្តុះបណ្តាលបច្ចេកទេស (NTTI) ក្រោយវត្តទឹកថ្លា រាជធានីភ្នំពេញ។
នៅក្នុងពិព័រណ៍ការងារ និង មគ្គទេសក៍អាជីពនេះ យុវជន សិស្ស/និស្សិត និង អ្នកស្វែងរកការងារ អាចស្វែងយល់អំពីទីផ្សារការងារនៅកម្ពុជា ស្វែងរកឱកាសការងារដែលខ្លួនពេញចិត្ត និង ស្របតាមជំនាញដែលខ្លួនកំពុងសិក្សា និង ចូលរួមសិក្ខាសាលាចែករំលែកចំណេះដឹងពីវាគ្មិនល្បីជាច្រើនផងដែរ។ សម្រាប់ព័ត៌មានបន្ថែម អាចទាក់ទងទៅកាន់ NEA តាមរយៈលេខ ០១៧ ៤៦ ៧៤ ២៣ ឬ ០១៧ ៨៧ ១៨ ០៧ និង តេលេក្រាម ០១៦ ៧៨ ៦៦ ៥៥ ឬ ០៧៧ ២៣ ២៣ ៧៨ (CoolApp) ឬ គេហទំព័រ https://careerfair.nea.gov.kh និង ទំព័រ Facebook (neakhmer)៕
