និយាយពីស្រីស្អាត គុណ កន្និកា មហាជនបានជ្រាបហើយថានាងជាម្ចាស់ជ័យលាភីគ្រងមកុដនៃកម្មវិធីបវរកញ្ញាយុវតី Miss Teen Icon Cambodia 2024 ដែលយុវតីរូបនេះ កំពុងត្រៀមខ្លួនតំណាងកម្ពុជាចូលរួមប្រកួតលើឆាកអន្តរជាតិ Miss Teen Icon International ក្នុងឆ្នាំ ២០២៥ នេះ។
ក្រោយក្លាយជាម្ចាស់មកុដបវរកញ្ញាយុវតី Miss Teen Icon Cambodia 2024 មួយរយៈកន្លងទៅនេះ គុណ កន្និកា មិនត្រឹមតែទទួលការចាប់អារម្មណ៍លើវិស័យបវរកញ្ញានោះទេ តែនាងក៏កំពុងក្ដោបបានប្រជាប្រិយភាពខ្លាំងក្នុងវិស័យសម្ដែងថែមទៀត ដោយកន្លងមកក្រៅពីធ្វើការហ្វឹកហាត់ត្រៀមប្រកួតលើឆាកអន្តរជាតិ នាងក៏ឆ្លៀតប្រឡូកចូលវិស័យសម្ដែងដែរ។
ក្រោយប្រឡូកចូលវិស័យសម្ដែងនេះដែរ បវរកញ្ញាយុវតី គុណ កន្និកា ត្រូវបានមហាជនផ្ទុះចាប់អារម្មណ៍សរសើរ និង បង្ហាញការគាំទ្រខ្លាំងចំពោះស្នាដៃសម្ដែងដ៏ប៉ិនប្រសប់ជាតួស្រីក្នុងខ្សែភាពយន្តភាគខ្មែរបន្តបន្ទាប់របស់ស្ថានីយទូរទស្សន៍បាយ័ន ជាពិសេសក្ដោបបានឱកាសសម្ដែងជាតួឯកស្រីក្នុងភាពយន្តខ្នាតធំ ២ រឿងទៀត ជាប្រភេទរឿងដ៏រន្ធត់ព្រឺព្រួច និង កម្សត់ គឺរឿង «ភ្លើងឆេះក្លឹបក្រោមដី» និង «ព្រាយបំពេកូន» ដែលកំពុងត្រៀមចាក់បញ្ចាំងគ្រប់រោងភាពយន្តខ្មែរឆាប់ៗខាងមុខ។
ដោយឡែក ស្របពេលកំពុងផ្ទុះប្រជាប្រិយភាព និង មមាញឹកថតភាពយន្តបន្តបន្ទាប់នេះ គុណ កន្និកា ក៏កំពុងត្រៀមខ្លួនយ៉ាងស្វាហាប់ ខណៈដំណើរការតំណាងកម្ពុជាចូលរួមប្រកួតលើអន្តរជាតិកាន់តែកៀកថ្ងៃហើយដែរ ដោយកម្មវិធី Miss Teen Icon International2025 នឹងប្រព្រឹត្តឡើងជាផ្លូវការនៅថ្ងៃទី ១៨ ដល់ទី ២៦ ខែឧសភា ឆ្នាំ ២០២៥ ខាងមុខនេះនៅកម្ពុជាជាម្ចាស់ផ្ទះ៕
