ត្រឹមឫស្សីត្បាញ កូនខ្មែរអាចដកស្រង់ច្នៃជាសម្លៀកបំពាក់ហ្វេហ្សិន ស្ទីលឡូយ សមបំផុតសម្រាប់យុវវ័យ

អ្វីៗជុំវិញខ្លួនរមែងជាចំណីគំនិតសម្រាប់បង្កើតអ្វីដែលថ្មី ជាពិសេស នៅក្នុងពិភពហ្វេហ្សិន។ ជាក់ស្តែង ដូចជាអ្នកច្នៃម៉ូដកូនខ្មែរមួយរូប បានច្បិចយកប្រពៃណីត្បាញឫស្សី មកបង្កើតជាម៉ូដសម្លៀកបំពាក់បែបថ្មី មើលមកឡូយ ស្ទីលហ្វេហ្សិនលំដាប់ខ្ពស់។

ខូឡិកហ្សិនដងស្រង់ពីឫស្សីត្បាញនេះ មានឈ្មោះថា Verdelattice’s Collection បង្កើតឡើងដោយអ្នកច្នៃម៉ូដ Darya Chea ជាការលាយបញ្ចូលគ្នានៃមរតកសិល្បៈហត្ថកម្ម និង ការច្នៃប្រឌិតទំនើប។ ពិតណាស់ អ្នកច្នៃម៉ូដរូបនេះ បានបង្កើតសម្លៀកបំពាក់ ដោយចាក់ឫសយ៉ាងជ្រៅ ទៅនឹងភាពស្រស់ស្អាតនៃប្រពៃណីត្បាញឫស្សីរបស់ជនជាតិដើមភាគតិច។ វាជាការស្រមើស្រមៃឡើងវិញនូវបច្ចេកទេសចាស់ ដោយបង្ហាញតាមរយៈស្ថាបត្យកម្មសហសម័យ។

ជាលទ្ធផល ភាសានៃការច្នៃម៉ូដនេះ បានបរិយាយពី ថាមពលរចនាសម្ព័ន្ធផង និង លំហូរបែបធម្មជាតិផង ដែលដូចទៅនឹងភាពរឹងមាំ ភាពបត់បែន និង ក្បាច់នៃដើមឫស្សី។ ការច្នៃម៉ូដចេញជាសម្លៀកបំពាក់បុរស និង នារី ស្ទីលនេះមានលក្ខណៈហ្វេហ្សិនស៊ីវិល័យ ត្រូវបំផុតសម្រាប់យុវវ័យសម័យទំនើប៕

ប្រភព៖ RIC