ត្រឹមវ័យ ១៨ ឆ្នាំ! ហ្សូលីយ៉ា បំពេញតួនាទីល្អខ្លាំងលើឆាកអន្តរជាតិនៅឥណ្ឌា បង្ហាញខ្លួនឆ្វាចៗគ្រប់កម្មវិធីមិនឱ្យចាញ់បវរកញ្ញាដទៃ

រយៈពេលជាង ១០ ថ្ងៃហើយ ដែល Miss World Cambodia 2025 កញ្ញា រ៉ូសស្យែល ហ្សូលីយ៉ា បានចាកចេញពីមាតុប្រទេសទៅកាន់ប្រទេសឥណ្ឌា តំណាងឱ្យកម្ពុជាចូលរួមប្រកួតក្នុងកម្មវិធី Miss World 2025។

មកដល់ពេលនេះ កម្មវិធី Miss World 2025 កាន់តែកៀកពេលវេលាប្រកួតផ្ដាច់ព្រ័ត្រហើយ ដែលនឹងប្រព្រឹត្តទៅនៅថ្ងៃទី ១៧ ខែឧសភា ឆ្នាំ ២០២៥ នេះ ដោយពេលនេះដែរ ក្រឡេកមើលបេក្ខភាពបវរកញ្ញាកម្ពុជាយើងគឺកញ្ញា រ៉ូសស្យែល ហ្សូលីយ៉ា ក៏កំពុងស្ថិតក្នុងដំណើរការប្រកួតត្រៀមខ្លួនយ៉ាងស្វាហាប់ផងដែរ។

ក្នុងដំណើរប្រកួតរយៈពេលជាង ១០ ថ្ងៃនេះ បវរកញ្ញាកូនខ្មែរកាត់អាមេរិក ហ្សូលីយ៉ា តែងឆក់បានការចាប់អារម្មណ៍ និង សរសើរខ្លាំងពីមហាជនអ្នកគាំទ្រខ្មែរជាមួយនឹងវត្តមានរបស់នាងក្នុងដំណើរការប្រកួតពីមួយថ្ងៃទៅមួយថ្ងៃកាន់តែស្រស់ស្អាតលេចធ្លាខ្លាំង។

ជាក់ស្ដែង ក្រឡេកទៅមើលការតុបតែងខ្លួនរបស់ ហ្សូលីយ៉ា វិញ ក្នុងឈុតនីមួយៗដែលរៀបចំខ្លួនបានយ៉ាងល្អ ទាំងការផាត់មុខ ធ្វើសក់ និង ឈុតដ៏ប្រណីតៗស្រស់ស្អាតហាក់វ៉ាដាច់បេក្ខភាពបវរកញ្ញាដទៃគ្រប់កម្មវិធីផ្សេងៗរបស់ Miss World 2025៕