ក្រោយ សម្តេចមហាបវរធិបតី ហ៊ុន ម៉ាណែត បង្ហោះសារនៅលើទំព័រហ្វេសប៊ុកថា ចំពោះប្រជាពលរដ្ឋខ្មែរ ដែលកំពុងរស់នៅ ធ្វើការឬសិក្សានៅប្រទេសថៃ ដែលអាចរងសម្ពាធពីការរើសអើង សូមត្រលប់មកកម្ពុជាយើងវិញ គិតមកទល់ពេលនេះ បងប្អូនខ្មែរយើងបានសម្រុកមកជាបន្តបន្ទាប់ខ្ទង់ម៉ឺននាក់។
ជាក់ស្តែង ព្រឹកនេះតាមរយៈទំព័រហ្វេសប៊ុក ក្រសួងការពារជាតិ អ្នកនាំពាក្យក្រសួងការពារជាតិ បានធ្វើការបញ្ជាក់ជូនដូចខាងក្រោម៖
1-យោងតាមរបាយការណ៍របស់ក្រសួងការងារ និង បណ្តុះបណ្តាលវិជ្ជាជីវៈ ចាប់តាំងពីថ្ងៃទី ២៤ ខែកក្កដា រហូតមកដល់ថ្ងៃទី ២៧ ខែកក្កដា ឆ្នាំ ២០២៥ ពលករខ្មែរបានវិលត្រឡប់ពីប្រទេសថៃវិញ មានចំនួនប្រមាណ ២០៣ ៧០៦ នាក់ ដោយឡែកកាលពីថ្ងៃម្សិលមិញ មានពលរដ្ឋខ្មែរចំនួន ១២០ ៤៣៨ នាក់ ដែលបានវិលចូលប្រទេសកម្ពុជាវិញ។ នៅថ្ងៃនេះ យើងរំពឹងថានឹងមានពលករវិលត្រឡប់ពីប្រទេសថៃមកកម្ពុជាប្រមាណជាង ១៥ម៉ឺននាក់។ ដូច្នេះក្នុងរយៈពេល ៥ ថ្ងៃនេះ ពលករខ្មែរបានវិលត្រឡប់មកកាន់កម្ពុជាវិញប្រមាណជិត ៤០ ម៉ឺននាក់ ហើយចំនួននេះនឹងត្រូវកើនឡើងបន្ថែមទៀត ប្រសិនបើការប្រយុទ្ធគ្នានៅតែបន្ត៕
