ថ្មីៗនេះ នាយកដ្ឋានប្រយុទ្ធនឹងជំងឺឆ្លង នៃក្រសួងសុខាភិបាលសាធារណៈរបស់ថៃ បានរាយការណ៍ពីស្ថានភាពជំងឺកូវីដ-១៩ ប្រចាំសប្តាហ៍ ដោយបានឱ្យដឹងថា ត្រឹមដើមខែមិថុនានេះ មានអ្នកឆ្លងកូវីដថែមដល់ទៅ ១ សែននាក់ នឹងស្លាប់អស់ ៣៣ នាក់។
តាមទិន្នន័យបានបង្ហាញឱ្យដឹងថា ក្នុងសប្តាហ៍ទី ២៣ នៃឆ្នាំ ២០២៥ គឺចន្លោះពីថ្ងៃទី ១ ដល់ ៧ ខែមិថុនា ឆ្នាំ ២០២៥ នេះ ប្រទេសថៃមានអ្នកឆ្លងជំងឺកូវីដ ១៩ បន្ថែមរហូតដល់ទៅ ១០៥ ២២៥ នាក់ បែងចែកជាអ្នកជំងឺខាងក្រៅចំនួន ៩៩ ៦១៦ នាក់ អ្នកជំងឺធ្ងន់ធ្ងរសម្រាកនៅមន្ទីរពេទ្យមានចំនួន ៥ ៦០៩ នាក់ ចំណែកអ្នកស្លាប់មានចំនួន ៣៣ នាក់។ ដោយឡែកចំនួនអ្នកជំងឺសរុបក្នុងឆ្នាំ ២០២៥ នេះ មានចំនួន ៤០០ ១៥៥ នាក់ រីឯអ្នកស្លាប់មានចំនួន ១០០ នាក់។
ទិន្នន័យបានបង្ហាញទៀតថា អ្នកឆ្លងច្រើនបំផុតគឺនៅក្នុងទីក្រុងបាងកក ភាគច្រើនគឺជាមនុស្សវ័យកណ្តាលដែលមានអាយុពី ២០ ដល់ ៣៩ ឆ្នាំ។ ទន្ទឹមនឹងនេះដែរ អ្នកជំងឺដែលមានវ័យចំណាស់បានកើតឡើងដល់ ១៨ ២៦៤ នាក់ ដែលកំពុងតែបង្កឱ្យមានការព្រួយបារម្ភ៕
ប្រភព៖ PPTVHD36
