កាលពីថ្ងៃទី ១៩ ខែសីហា ឆ្នាំ ២០២៥ កន្លងទៅនេះ សារព័ត៌មាន Khaosod បានរាយការណ៍អំពីកង្វះការនាំចូលត្រីឆ្ដោពីកម្ពុជាចូលទៅក្នុងទីផ្សាររបស់ថៃ ព្រោះតែការប៉ះទង្គិចនៅព្រំដែន បណ្តាលឱ្យអ្នកលក់ត្រីគ្មានត្រីឆ្តោលក់ រីឯត្រីឆ្ដោដែលមាន គឺឡើងថ្លៃដល់ទៅជិត ៣ ម៉ឺនក្នុងមួយគីឡូក្រាម។
តាមរយៈការសម្ភាសអ្នកលក់ត្រីម្នាក់ នៅក្នុងផ្សារមួយកន្លែង នាខេត្តកំផែងពេជ្រ បានឱ្យដឹងថា នៅក្នុងផ្សារនេះមិនមានត្រីឆ្ដោលក់ទៀតឡើយ ព្រោះត្រីឆ្ដោដែលលក់កន្លងមក គឺនាំចូលពីកម្ពុជា ហើយតាំងពីមានជម្លោះព្រំដែនមក ត្រីឆ្តោក៏មិនអាចនាំចូលមកដូចមុនឡើយ។
យ៉ាងណាមិញ បើសិនជាមានលក់ ក៏មានមិនច្រើននោះដែរ ដូចនេះទើបតម្លៃហក់ឡើងខ្លាំង ពោលគឺពីមុនធ្លាប់តែលក់មួយគីឡូ ១៨០ បាត ឥលូវឡើងដល់ ២៥០ បាតឯណោះ។ ជាពិសេស បើសិនជាត្រីឆ្តោតូចៗ ក៏មិនមានអ្នកទិញទៀត ភាគច្រើនគឺខាងហាងអាហារគេត្រូវការតែត្រីឆ្តោធំៗតែប៉ុណ្តោះ៕
ប្រភព៖ Khaosod
