ក្រោយពីការវិលត្រឡប់ពីការប្រកួតកម្មវិធី Miss Universe លើកទី ៧៤ វិញហើយនោះ អ្នកនាង ហ្វីយ៉ាតា Miss Universe Cambodia 2025 កាន់តែទទួលបានការចាប់អារម្មណ៍យ៉ាងខ្លាំងពីសំណាក់អ្នកគាំទ្រ បន្ទាប់ពីបវរកញ្ញាកម្ពុជារូបនេះ បានកាន់ទង់ជាតិកម្ពុជា និង ស្រែកឈ្មោះកម្ពុជាយ៉ាងខ្លាំងៗលើឆាកអន្តរជាតិនៅប្រទេសថៃកន្លងមក។
ក្រឡេកទៅមើលការងារវិញ ក្រោយពីបានមកដល់មាតុប្រទេសវិញ Miss Universe Cambodia 2025 ហ្វីយ៉ាតា កាន់តែមមាញឹកខ្លាំងក្នុងនាមជាថៅកែហាង និង ម្ចាស់ប៊្រេនផលិផលថែសម្រស់ ក៏ដូចជាការងារផ្សេងៗលើវិថីសិល្បៈផងនោះ។
យ៉ាងណាមិញ ថ្មីៗនេះ អ្នកនាង ហ្វីយ៉ាតា បានធ្វើឱ្យអ្នកគាំទ្រចាប់អារម្មណ៍នឹងរូបភាពប៉ុន្មានសន្លឹករបស់អ្នកនាង ដែលបានស្កាត់ជួប លោកជំទាង យឹម ឆៃលីន ព្រមទាំងបានបង្ហោះសារមួយយ៉ាងមានអត្ថន័យទៀតផង។
ក្នុងនោះដែរ អ្នកនាង ហ្វីយ៉ាតា បានរៀបរាប់ថា៖ «Empowered women, empower another women… well spent time» ដោយមានអត្ថន័យថា៖ «ស្ត្រីដ៏ខ្លាំង, ផ្តល់ឥទ្ធិពលដល់ស្ត្រីដទៃ… ពេលវេលាដ៏មានតម្លៃ»។ លើសពីនោះ មានមហាជនជាច្រើនបានចូលទៅបញ្ចេញមតិសរសើរជាបន្តបន្ទាប់ ពីភាពខ្លាំងរបស់ លោកជំទាវ យឹម ឆៃលីន ក៏ដូចជាអ្នកនាង ហ្វីយ៉ាតា៕
