ការបង្កើតវីដេអូប្លែកៗដើម្បីប្រូម៉ូតផលិតផល ជាជំនាញទៅហើយសម្រាប់អ្នកលក់អនឡាញ។ ជាមួយគ្នានេះ អ្វីកាន់តែថ្មី ហើយប្លែកទៀតនោះ គឺថ្មីៗនេះមហាជនបានផ្ទុះការចាប់អារម្មណ៍ និង មានការហួសចិត្តយ៉ាងខ្លាំង បន្ទាប់ពីបានឃើញអ្នកលក់អនឡាញមួយចំនួនក្នុងស្រុក បានធ្វើវីដេអូបង្ហាញពីការសម្រុកចូលបន្ទប់ទឹក ពេលកំពុងមានមនុស្សខាងក្នុងខណៈដោះទុក្ខសត្វ ហើយនិយាយធ្វើប្រូម៉ូតផលិផល។
ជាក់ស្តែង វីដេអូបែបនេះមានការ Trending ដែលអាចទាក់ទាញអ្នកទស្សនាចូលមើលច្រើន ហើយក៏ជាការពញ្ញាក់អារម្មណ៍ប្លែកថ្មី តែយ៉ាងណាមិញវាហាក់បង្ហាញពីសកម្មភាព និង ទង្វើមួយមិនសមរម្យទាល់តែសោះ ព្រមទាំងមិនគួរឱ្យកើតមានក្នុងសង្គមខ្មែរ។
ជាការពិត ការធ្វើបែបនេះបានបង្ហាញពីទង្វើឈ្លានពានឯកជនភាព និង កេរ្តិ៍ខ្មាស ជាដើម ឧទាហរណ៍ មានវីដេអូខ្លះ ពេលកំពុងមានមនុស្សបន្ទោបង់ក្នុងបន្ទប់ទឹកសុខៗ ស្រាប់តែអ្នកថតវីដេអូបានសម្រុកបើកទ្វារចូល រួចនិយាយប្រូម៉ូតផលិតផល ឬ សេវាកម្មរបស់ពួកគេ។ ទន្ទឹមនឹងវីដេអូខ្លះទៀត ខណៈគេកំពុងងូតទឹក ស្រាប់តែបើកទ្វារបន្ទប់ទឹកហើយនិយាយពីប្រម៉ូសិន ឬ ពេលខ្លះគេកំពុងហាត់ប្រាណ ស្រាប់តែចាប់សម្រាតឱ្យចេញលីអូ និយាយក៏មាន។
កន្លងមកវីដេអូបែបនេះ គេសង្កេតឃើញមានការពេញនិយមធ្វើពីអ្នកលក់អនឡាញនៅក្រៅប្រទេសប៉ុណ្ណោះ តែក្រោយមិននឹកស្មានថាមានអ្នកលក់អនឡាញនៅកម្ពុជាមួយចំនួន ក៏បានធ្វើជាបន្តបន្ទាប់ ហើយផ្ទុះការចាប់អារម្មណ៍។ ចុះសម្រាប់ប្រិយមិត្តវិញយល់យ៉ាងណាដែរ សម្រាប់សកម្មភាពថតវីដេអូបែបនេះ?
