ពិតណាស់ ជារៀងរាល់ឆ្នាំឱ្យតែកៀកថ្ងៃពិធីបុណ្យចូលឆ្នាំថ្មីប្រពៃណីជាតិខ្មែរ តែងសង្កេតឃើញវត្តមានអ្នកក្នុងរង្វង់សិល្បៈខ្មែរ ក៏ដូចជាស្រីស្អាតជាបវរកញ្ញាបានតែងខ្លួនជាទេវធីតា ដែលប្រដាប់ដោយគ្រឿងសម្លៀកបំពាក់ល្អល្អះ ស្រស់ស្អាត និង ប្រណីតៗយ៉ាងទាក់ទាញ។
យ៉ាងណាមិញ ខណៈពិធីបុណ្យចូលឆ្នាំប្រពៃណីជាតិខ្មែរជិតចូលមកដល់នេះដែរ ចំពោះតួអង្គតំណាងទេវធីតាឆ្នាំថ្មីដែលត្រូវសម្ដែងក្នុងកម្មវិធីទូរទស្សន៍ជាតិ ក៏មិនទាន់ឃើញមានការបង្ហាញមុខនៅឡើយថាជាស្រីស្អាតរូបណា ដែលនឹងត្រូវដើរតួរជាព្រះនាង គោរាគទេវី ឆ្នាំម្សាញ់ យាងចុះមកគ្រងជម្ពូទ្វីបនៅថ្ងៃទី ១៤ ខែមេសា គ្រិស្តសករាជ ២០២៤ វេលាម៉ោង ០៤ និង ៤៨ នាទី ខាងមុខនេះ។
ដោយឡែក បើងាកទៅមើលលើបណ្ដាញសង្គមវិញ ឃើញថាស្រីស្អាតក្នុងសិល្បៈ ក៏ដូចជាវិស័យបវរកកញ្ញា កំពុងតែងជាទេវធីតាថតបង្ហោះលើហ្វេសប៊ុកបណ្ដើរៗហើយ ដែលបានឃើញបវរកញ្ញា ២ រូប គឺកញ្ញា អ៊ិន លក្ខិណា និង កញ្ញា ដេត ស្រីនាឌ បានតុបតែងខ្លួនទ្រង់គ្រឿងជាទេវធីតាឆ្នាំថ្មី ព្រះនាង គោរាគទេវី យ៉ាងស្រស់ស្អាតខ្លាំងផងដែរ។
ចំពោះការតុបតែងជាបុត្រីទី ២ កបិលមហាព្រហ្ម ព្រះនាង គោរាគទេវី នោះដែរ កំពុងត្រូវបានមហាជនអ្នកគាំទ្រចែករំលែក និង សរសើរខ្លាំងពីរូបសម្រស់របស់បវរកញ្ញាទាំង ២ រូបនេះស្រស់ស្អាតប្លែកជាមួយឈុតទេវធីតាដ៏ល្អឯកនេះ៕
