PIPATCHARA គឺម៉ាកសម្លៀកបំពាក់មានប្រជាប្រិយភាពខ្លាំងមួយរបស់ថៃ ជាពិសេស បន្ទាប់ពីតារាចម្រៀង Lisa សមាជិកក្រុមចម្រៀងកូរ៉េ Blackpink បានស្លៀកឈុតទៅចូលរួមជប់លៀងកម្មវិធីប្រណាំងឡាន Monaco F1 Grand Prix 2024 វារឹតតែធ្វើឱ្យម៉ាកនេះល្បីល្បាញជាសកល។ អ្វីដែលគួរឱ្យភ្ញាក់ផ្អើល និង មិននឹកស្មានដល់ សម្លៀកបំពាក់ដែលមើលមកឡូយ ស៊ីវិល័យ ម៉ូដផ្គុំឡើងដោយបំណែកជ័រតូចៗនេះ ត្រូវបានធ្វើឡើងពីគម្របដបជ័រដែលគេបោះចោលប៉ុណ្ណោះ។
វាជាការពិត ដែលសម្លៀកបំពាក់នេះធ្វើឡើងពីសំណល់គម្របដបដែលគេប្រើប្រាស់រួច។ បំណែកជ័រនៃសម្លៀកបំពាក់ត្រូវបានច្នៃឡើងវិញ ចាក់ពុម្ពចេញជារាងបីជ្រុង មានមុខសម្រាប់ថ្ពក់ជាមួយដែក អាចភ្ជាប់គ្នាបង្កើតជាសម្លៀកបំពាក់ឬម៉ូដផ្សេងៗទៅតាមការច្នៃប្រឌិត។ ភាពប្លែកភ្នែកនេះ មិនត្រឹមតែបង្ហាញពីអត្តសញ្ញាណនៃស្ទីលរបស់ម៉ាកយីហោប៉ុណ្ណោះទេ តែថែមទាំងបង្ហាញពីការប្តេជ្ញាចំពោះបរិស្ថាន និង គាំទ្រសហគមន៍ផងដែរ។
ម៉ាក PIPATCHARA គឺជាការសហការគ្នាបង្កើតដោយបងប្អូនស្រីពីរនាក់គឺ Petch-Pipatchara Kaewchinda និង ប្អូនស្រីរបស់នាង Thapthim-Jitrinee ។ អ្នកទាំងពីរមានចំណូលចិត្តខ្លាំងទៅក្នុងពិភពសិល្បៈ និង សិប្បកម្ម ជាពិសេស តិចនិចនៃសិល្បៈចាក់ Macramé។ អ្នកទាំងពីរមានចក្ខុវិស័យចំពោះនិរន្តភាព និង លើកកម្ពស់ផលិតផលក្នុងស្រុក។ ការផលិតផ្តោតទៅលើការប្រើប្រាស់ប្លាស្ទិកឡើងវិញ ដូចជាគម្របដបជ័រ ដែលជាគ្រឿងផ្សំចម្បងសម្រាប់ការឌីហ្សាញ។ ពួកគេបានប្រើបច្ចេកទេសចាក់បែប Macramé ដោយឱ្យសិប្បករក្នុងស្រុកមកពីសហគមន៍ផ្សេងៗគ្នាជាអ្នកផលិត។ ជាលទ្ធផល ផលិតផលរបស់ពួកគេមិនត្រឹមតែមានសោភណភាពប៉ុណ្ណោះទេ តែថែមទាំងមិនប៉ះពាល់ដល់បរិស្ថានផងដែរ។
ដូចបានឃើញជាក់ស្តែង ឈុតដែលតារាចម្រៀង Lisa បានពាក់ រ៉ូបរបស់នាងធ្វើឡើងពីប្លាស្ទិក ១៨០០ បំណែក ដែលច្នៃពីគម្របដបពណ៌មាស និង ជាប្លាស្ទិកថ្លា។ ម៉ាកនេះមិនត្រឹមតែធ្វើទីផ្សារក្នុងស្រុកប៉ុណ្ណោះទេ តែក៏បានឆ្ពោះទៅអន្តរជាតិ ក្លាយជាម៉ាកប្រណីតលំដាប់ខ្ពស់ផងដែរ។ តួយ៉ាង កន្លងមកម៉ាកនេះបានដើរម៉ូដនៅឌូបៃជាមួយខូឡិកហ្សិនរដូវក្តៅ spring-summer 2024 និង នៅក្នុងកម្មវិធី London Fashion Week ជាដើម។
បច្ចុប្បន្ន ម៉ាក PIPATCHARA ផ្ទុះការចាប់អារម្មណ៍ខ្លាំង មានទីផ្សារជាសកល មួយឈុតៗមានតម្លៃខ្ពស់ ភ្ញៀវពេញចិត្តសុទ្ធតែជាបុគ្គលលំដាប់ខ្ពស់ ជាពិសេសតារាល្បីៗលំដាប់ពិភពលោក៕
ប្រភព៖ sawaseed
