ក្រោយពីបានក្លាយទៅជា Top 4 ក្នុងកម្មវិធី Cambodian Idol រដូវកាលទី ៤ ហើយនោះ លោក ថុល សុភិទិ ក៏បានក្លាយទៅជាតារាចម្រៀងអាជីព ជ្រកក្រោមផលិតកម្មរស្មីហង្សមាស ដោយសារកេរ្តិ៍ឈ្មោះ ទទួលបានប្រជាប្រិយភាពយ៉ាងខ្លាំង។
យ៉ាងណាមិញ ថ្មីៗនេះ លោក ថុល សុភិទិ ក៏បានប្រកាសក្លាយជាតារាចម្រៀងផ្លូវការរបស់ផលិតកម្ម Gen Music ដែលជាបក្សសម្ព័ន្ធរបស់ផលិតកម្មរស្មីហង្សមាស និង បានបញ្ចេញនូវ MV ចម្រៀងថ្មីរបស់លោកមានចំណងជើងថា «ភាន់ភាំង (Flashback)»។ MV នេះដែរ ក្រោយបានបង្ហោះជាផ្លូវការត្រឹមរយៈពេល ២២ ម៉ោង ប៉ុណ្ណោះ ក៏មានអ្នកទស្សនាដល់ទៅ 1M ទៅហើយ។
ងាកទៅកាន់តួសម្តែងក្នុង MV ឯណោះវិញ មហាជនច្បាស់ជាបានជ្រាបហើយថា តួឯកស្រីជាដៃគូសម្តែងចាស់របស់លោក ថុល សុភិទិ ដែលធ្លាប់សម្តែង MV ជាមួយគ្នាកាលពីពេលកន្លងមក គឺ កញ្ញា ឡៃអ៊ី។ ក្នុងនោះ អ្វីដែលកាន់តែចាប់អារម្មណ៍ គឺតួប្រុស មានការសម្តែងដោយមនុស្ស ២ នាក់ ផ្សេងគ្នា ដោយម្នាក់ជាលោក ថុល សុភិទិ ផ្ទាល់ រីឯម្នាក់ទៀត គឺលោក Sokka ដែលគេស្គាល់ថា ជាអ្នកថតរូបអាជីពមួយរូប។
MV ដែលមានការសម្តែង ដោយលោក ថុល សុភិទិ និង លោក Sokka ដែលសម្តែងជាតួអង្គតែមួយ តែមានមនុស្ស ២ នាក់នោះ អាចនឹងធ្វើឱ្យមហាជនមួយចំនួនយល់ច្រឡំថា ជាការប្រើបច្ចេកវិទ្យា AI ដែលគេកំពុងនិយម ប៉ុន្តែការពិតទៅ គឺលោក Sokka ពិតជាមានមុខមាត់ស្រដៀងខ្លាំងនឹងលោក ថុល សុភិទិ សឹងតែទាំងស្រុង៕
