ប៉ុន្មានឆ្នាំចុងក្រោយនេះ កម្មវិធី Miss Grand International តែងមានរឿងមិនចេះចប់ ជាពិសេសជាមួយម្ចាស់មកុដតំណាងប្រទេស និង តំណែងអន្តរជាតិ។ ជាក់ស្តែង កន្លងមកស្ថាប័ន Miss Grand International បានប្រកាសអំពីការដកហូតតំណែងម្ចាស់មកុដ ដែលតាមធាតុពិតទៅអ្នកគាំទ្រសុទ្ធតែដឹងច្បាស់ថា ម្ចាស់តំណែងសាមីខ្លួនគឺជាអ្នកបោះបង់មុនកម្មវិធីប្រកាសទៅទៀត។ ថ្ងៃនេះ យើងសូមលើកពីអតីតម្ចាស់មកុដ ៦ រូប ទាំងម្ចាស់តំណែងធំ និង តំណែងរង ដែលបានប្រកាសលាលែងពីតំណែងពីកម្មវិធី Miss Grand International តាំងពីកម្មវិធីនេះបង្កើតឡើងចាប់ពីឆ្នាំ ២០១៣ មកទល់បច្ចុប្បន្ន។
១. នាង Anea Garcia មកពីសាធារណរដ្ឋដូមីនិក (dominican republic) ម្ចាស់ជ័យលាភី Miss Grand International 2015
ក្រោយគ្រងតំណែងបានតែ ៥ ខែ នាង Anea Garcia ត្រូវបានស្ថាប័ន Miss Grand International ប្រកាសដកហូតតំណែង ក្រោមហេតុផលពីស្ថាប័នថានាងមិនអាចបំពេញទំនួលខុសត្រូវរបស់នាងបាន តែយ៉ាងណាព័ត៌មានពីនាង Anea Garcia ថាមានមូលហេតុចាំបាច់ផ្ទាល់ខ្លួនពាក់ព័ន្ធជាមួយគ្រួសារដែលខាងស្ថាប័នមិនអនុញ្ញាត ទើបនាងសម្រេចលាលែងពីតំណែង។ ក្រោយការលាលែងនេះ នាង Claire Elizabeth Parker បវរកញ្ញារបស់ប្រទេសអូស្ត្រាលី ក៏ត្រូវបានជ្រើសរើសជាអ្នកជំនួសតំណែងម្ចាស់ជ័យលាភីឆ្នាំ ២០១៥។
២. នាង Claire Elizabeth Parker មកពីអូស្ត្រាលី ជាអ្នកជំនួស Miss Grand International 2015
នៅឆ្នាំ ២០១៩ នាង Claire Elizabeth Parker ត្រូវបានស្ថាប័ន Miss Grand International ដកហូតពីតំណែង ក្រោមហេតុផលការមិនពិភាក្សាជាមួយស្ថាប័នអំពីការចូលកម្មវិធីប្រកួតផ្សេង បន្ទាប់ពីនាងបានដាក់ពាក្យចូលរួមប្រកួតកម្មវិធីបវរកញ្ញាចក្រវាល Miss Universe។
៣. នាង Yuvna Rinishta មកពីប្រទេសម៉ូរីស (Mauritius) ម្ចាស់ជ័យលាភីលំដាប់រងទី ៥ នៃ Miss Grand International 2022
នាង Yuvna Rinishta ជាម្ចាស់ជ័យលាភីលំដាប់រងទី ៥ នៃ Miss Grand International 2022។ ក្រោយគ្រងតំណែងបានបីថ្ងៃ នាងត្រូវបានស្ថាប័ន Miss Grand International ប្រកាសដកហូតតំណែង ក្រោមហេតុផលអសមត្ថភាពក្នុងការចុះកិច្ចសន្យា និង បំពេញភារកិច្ចរបស់ខ្លួន។ អ្នកចូលជំនួសនាងបន្ទាប់គឺ Roberta Angela មកពីប្រទេសហ្វីលីពីន។
៤. នាង Thae Su Nyein មកពីមីយ៉ាន់ម៉ា ជ័យលាភីលំដាប់រងទី ២ ក្នុងកម្មវិធីប្រកួត Miss Grand International 2024
នាងត្រូវបានដកហូតតំណែងវិញ ក្រោមហេតុផល «អាកប្បកិរិយាមិនសមរម្យ» តែតាមពិតទៅមុនប្រកាសដកតំណែង នាង Thae Su Nyein ខ្លួនឯងផ្ទាល់ទេ ដែលជាអ្នកសម្រេចចិត្តបោះបង់តំណែងមុន ដោយហេតុឃើញថាកម្មវិធីមិនភាពយុត្តិធម៌ចំពោះខ្លួន។
៥. នាង Rachel Gupta មកពីឥណ្ឌា ម្ចាស់មកុដ Miss Grand International 2024
ថ្មីៗនេះ នាងបានប្រកាសនៅលើគណនី Instagram របស់ខ្លួន ដោយសម្រេចចិត្តលាលែងពីតំណែង និង ប្រគល់មកុដឱ្យស្ថាប័ន Miss Grand International វិញ។ នាងលើកហេតុផលថា «ស្ថាប័នបំពានកិច្ចសន្យា មិនយកចិត្តទុកដាក់លើនាងបានល្អ និង ធ្វើឱ្យនាង Toxic»។
ក្រោយនាងបង្ហោះតែប៉ុន្មាននាទី ស្ថាប័ន Miss Grand International ក៏បានធ្វើការប្រកាសនៅលើទំព័រហ្វេសប៊ុក ដកហូតតំណែងរបស់នាងក្រោមហេតុផលផ្ទុយគ្នាថា នាងខកខានក្នុងការបំពេញភារកិច្ចដែលបានកំណត់, ការចូលរួមនៅក្នុងគម្រោងខាងក្រៅដោយគ្មានការយល់ព្រមជាមុនពីស្ថាប័ន, និង ការបដិសេធរបស់នាងក្នុងការចូលរួមក្នុងការធ្វើដំណើរ ដែលបានគ្រោងទុកទៅកាន់ប្រទេសហ្គាតេម៉ាឡា។ មិនថាហេតុផលយ៉ាងណាពីស្ថាប័ន មហាជន និង អ្នកគាំទ្រសុទ្ធតែដឹងច្បាស់ថា ម្ចាស់មកុដជាអ្នកបោះបង់ដោយខ្លួនឯង ព្រោះនាងជាអ្នកប្រកាសមុន។
៦. នាង Safiétou Kabengele មកពីប្រទេសបារាំង ជ័យលាភីលំដាប់រងទី ៣ ក្នុងកម្មវិធីប្រកួត Miss Grand International 2024
នាង Safiétou Kabengele មកពីប្រទេសបារាំង និង ជាលំដាប់រងទី ៣ បានសម្រេចចិត្តលាលែងចេញពីដំណែង។ ក្នុងនោះនាងបានឱ្យដឹងថា កន្លងមកនេះនាងត្រូវគេមើលងាយប្រមាថដោយសាររឿងរ៉ាវមិនពិតជាច្រើន ប៉ុន្តែគ្មាននរណាម្នាក់នៅក្នុងស្ថាប័ន MGI ចេញមកបកស្រាយ ឬ ការពារនាងឡើយ អ្វីដែលធ្ងន់ជាងនេះ គឺលោក Nawat បាននិយាយមើលងាយនាងនៅមុខអ្នកដទៃថានាងបានលុយហើយក៏បាត់ខ្លួនទៅ ទាំងដែលនាងត្រឡប់ទៅប្រទេសមុនដោយសារតែម្តាយនាងឈឺ។
នាងបានបន្ថែមទៀតថា នាងបានព្យាយាមទាក់ទងទៅមនុស្សនៅក្នុងស្ថាប័ន បន្ទាប់ពីមានចចាមអារ៉ាមថានាងត្រូវបណ្តេញឱ្យចេញពីដំណែង តែខាង MGI មិនដែលអើពើនឹងបកស្រាយឡើយ សូម្បីតែលោកស្រី Teresa និង លោក Nawat ក៏បានប្លុកនាង ទើបធ្វើឱ្យនាងសម្រេចចិត្តលាលែងពីតំណែងនោះ៕
