មហាជនកំពុងតែហួសចិត្តអស់សំណើចយ៉ាងខ្លាំង ជាមួយនឹងរឿងរ៉ាវរបស់បុរសចំណាស់ម្នាក់នៅឯប្រទេសចិន ដែលបានច្រឡំដៃចុចទិញកូនមាន់ជាង ៥០០ ក្បាលតាមអនឡាញ កូនចៅគាំងមិនដឹងធ្វើអ្វី ចុងក្រោយសម្រេចចិត្តបើកកសិដ្ឋានចិញ្ចឹមមាន់នៅផ្ទះ។
តាមកូនស្រីបានរៀបរាប់ឱ្យដឹងថា ឪពុករបស់នាងបានច្រឡំដៃចុចទិញកូនមាន់ដោយមិនដឹងខ្លួនចំនួន ៥៥០ ក្បាលឯណោះ ក្នុងតម្លៃ ៧៩០ យ័ន ដែលស្មើប្រហែលជាង ៥០ ដុល្លារ ។ លុះនៅសុខៗស្រាប់តែមានគេដឹកកូនមាន់ជាង ១០ ប្រអប់មកដល់មុខផ្ទះ ស្រាប់តែឪពុកភ្ញាក់ព្រើត ប្រកែកញ៉ាញថាមិនបានទិញនោះទេ តែដល់ពេលម្តាយឆែកទូរស័ព្ទឪពុកមើលទៅ ទើបឃើញថាគាត់ពិតជាច្រឡំដៃទិញពិតមែន។
យ៉ាងណាមិញ ខាងអ្នកលក់មិនព្រមឱ្យដូរយកលុយវិញឡើយ ព្រោះតែជារបស់មានជីវិត រីឯឪពុកវិញក៏មិនដាច់ចិត្តចោលពួកវាទៀត ទើបនាំគ្នាសម្រេចចិត្តសង់ទ្រុងមាន់នៅផ្ទះ និងបើកទៅជាកសិដ្ឋានចិញ្ចឹមមាន់តែម្តងទៅ៕
ប្រភព៖ Khaosod
